“Bəzi obyektlərin qarajlarında və dayanacaqlarda avtomobillərin baqajları yoxlanılır. Əksər vaxtlarda bunun təhlükəsizlik məqsədilə edildiyi deyilir. Lakin, qanun şəxsin razılığı olmadan onun mülkiyyətinə baxış keçirilməsinə icazə vermir”.

RegionXəbərləricom.az Baku tv-yə istinadən xəbər verir ki, məsələyə hüquqşünas Emil Aslanov aydınlıq gətirib.

O, bildirib ki, şəxsin özəl mülkiyyəti toxunulmazdır, onun icazəsi olmadan avtomobilinin hansısa hissəsinə baxış keçirilə bilməz.

Bəs hansı hallarda avtomobil saxlanılaraq ona baxış keçirilə bilər, bu proses qanunla necə tənzimlənir?

Daxili İşlər Nazirliyinin Baş Dövlət Yol Polisi İdarəsinin Hərəkətin təhlükəsizliyinin təbliği və ictimai qurumlarla əlaqələr şöbəsinin rəisi Rövşən Tağıyev məsələnin qanunla necə tənzimləndiyini belə izah edib:

“Əgər nəqliyyat vasitəsi barəsində axtarış elan olunubsa və ya İnzibati Xətalar Məcəlləsinə uyğun olaraq nəqliyyat vasitəsinə baxış keçirmək üçün əsaslar olduqda, eləcə də, saxlanılmış nəqliyyat vasitəsində hər hansı bir qanunsuz yüklərin daşınmasına dair şübhələr varsa, bu halda Yol Patrul Xidməti əməkdaşları tərəfindən avtomobilə baxış keçirilə bilər.

Eyni zamanda, Yol Patrul Xidməti haqqında təlimata uyğun olaraq əməliyyat-profilaktik tədbirlərin keçirilməsi zamanı stasionar postlarda dayandırılmış nəqliyyat vasitələrinə baxış keçirilmsi şəxslərin, nəqliyyat vasitələrinin qeydiyyat və sürücülük sənədlərinin yoxlanılması həyata keçirilə bilər”.