Türkiyə Prezidenti Rəcəb Tayyib Ərdoğan Zəngilan Beynəlxalq Hava Limanının açılışında iştirak etmək üçün Azərbaycana yola düşüb.

Bu barədə Türkiyə Prezidentinin kommunikasiya mərkəzi məlumat yayıb.

“Ərdoğan İlham Əliyevlə birlikdə Azərbaycanın işğaldan azad edilmiş torpaqlarında türk şirkətlərinin töhfələri ilə inşa edilən ikinci Zəngilan Beynəlxalq Hava Limanının açılış mərasimində iştirak edəcək, eyni zamanda bölgənin inkişafı üçün başladılan yeni layihələrin təməlini qoyacaq”, - məlumatda bildirilib.

Səfər zamanı keçiriləcək ikitərəfli görüşlərdə Türkiyə ilə Azərbaycan arasında münasibətlərə bütün aspektlərdə yenidən baxılacağı, əməkdaşlığın daha da inkişaf etdirilməsi istiqamətində atılacaq addımların müzakirə olunacağı gözlənilir.

Həmçinin aktual regional və qlobal problemlər, ikitərəfli münasibətlər ətrafında fikir mübadiləsinin aparılması nəzərdə tutulur.

Qeyd edilib ki, R.T.Ərdoğanla bərabər Türkiyə Böyük Millət Məclisinin sədr müavini Cəlal Adan, xarici işlər naziri Mövlud Çavuşoğlu, kənd təsərrüfatı və meşə naziri Vahit Kirişçi, nəqliyyat və infrastruktur naziri Adil Qaraismailoğlu, AK Partiya sədrinin müavini Binəli Yıldırım, AK Partiya sədrinin köməkçisi və partiya sözçüsü Ömər Çelik, Prezidentin kommunikasiya mərkəzinin direktoru Fahrettin Altun və Prezidentin sözçüsü İbrahim Kalın da Zəngilana yola düşüb.