Xəbər verdiyimiz kimi, dekabrın 12-də səhər saatlarından bir qrup qeyri-hökumət təşkilatı nümayəndəsi, media təmsilçisi və ictimai fəal Rusiya sülhməramlılarının müvəqqəti nəzarətində olan Şuşa-Xankəndi yolunu bağlayıb. Aksiya iştirakçıları Azərbaycanın faydalı qazıntı yataqları, xüsusilə Qızılbulaq qızıl və Dəmirli mis-molibden yataqlarının qanunsuz istismarına etiraz etdiklərini söyləyərək Xocalı və Xankəndi tərəfə keçmək istəsələr də, sülhməramlı kontingent onlara imkan verməyib.

Sözügedən aksiyanın dördüncü günü tamamlanmaqdadır və hazırda da davam edir.

Aksiyaçılar ekoloji terrora son qoyulması, yataqlarda monitorinq keçirilməsi tələbləri ilə şüarlar səsləndiriblər.

Bundan başqa, etirazçılar bildiriblər ki, Rusiya sülhməramlılarının olduğu bütün postlarda xidmət Azərbaycanın aidiyyəti dövlət qurumları ilə birgə təşkil edilməlidir.

Şüarlarda Rusiya sülhməramlılarının komandanı Andrey Volkovla görüş tələbi də səsləndirilib.

Etirazçılar tələbləri yerinə yetirilməyənə qədər aksiyanı davam etdirəcəklərini bildirirlər.

Baku TV-nin hadisə yerindən yaydığı kadrları təqdim edirik:

Qeyd edək ki, ötən gün məsələyə münasibət bildirən Rusiya Xarici İşlər Nazirliyinin sözçüsü Mariya Zaxarova bunları deyib:

“Rusiya sülhməramlılarına qarşı ittihamlar və təxribat xarakterli hərəkətlər, “haradan gəlirsə gəlsin” qəbuledilməzdir və əks nəticə verir. Rusiya sülhməramlı kontingenti regionda sabitliyin qarantı rolunu oynayaraq, öz vəzifələrini səmərəli şəkildə yerinə yetirir".