“Rusiya hərbçilərinə silahı yerə qoyub canlarını xilas etmək imkanları barədə məlumat verən “Yaşamaq istəyirəm” layihəsinə artıq 7600-dən çox müraciət daxil olub”.

Bunu Ukraynanın Vyanadakı beynəlxalq təşkilatlar yanında daimi nümayəndəsinin müavini Nataliya Kostenko ATƏT-in Təhlükəsizlik Əməkdaşlıq Forumunun iclası zamanı deyib.

O, bildirib ki, canlı qüvvə və hərbi texnikada əhəmiyyətli itkilərə görə Rusiya növbəti səfərbərlik kampaniyası keçirməyə məcburdur. Eyni zamanda, Kreml “özəl hərbi şirkətlər” adlanan qurumlarda xidmət etmək üçün məhkum edilmiş cinayətkarları işə cəlb etməkdə davam edir. Onları əməkdaşlığa məcbur etmək üçün koloniyalarda onlar üçün “dözülməz saxlama şəraiti” yaradılır:

“Rusiyanın səfərbərlik səyləri fonunda Rusiya və Belarus ordularının hərbçilərinin təhlükəsiz təslim olmasına kömək etmək üçün nəzərdə tutulmuş “Yaşamaq istəyirəm” adlı Ukrayna dövlət layihəsinin populyarlığının artması faktını qeyd etməmək olmaz. Onun fəaliyyət göstərdiyi vaxtdan - 2022-ci il sentyabrın 15-dən etibarən ruslardan və Ukraynanın müvəqqəti işğal olunmuş ərazilərinin sakinlərindən təslim olma ehtimalı ilə bağlı 7600-dən çox müraciət daxil olub”.

Onun sözlərinə görə, təkcə yanvar ayında layihənin saytına 5,6 milyon istifadəçi daxil olub, onlardan 4,7 milyonu Rusiya Federasiyasından olub.

“Rusiya təbliğatı faktları təhrif etmədikcə, sizi əmin etmək istəyirəm ki, layihə çərçivəsində könüllü təslim olmuş hərbi əsirlərin saxlanması Cenevrə Konvensiyasının müddəalarına uyğun olaraq həyata keçirilir. Onların öz xahişi ilə, sonra mübadilə nəticəsində vətənə qayıda və ya sığınacaq istəyə bilərlər”, - ukraynalı diplomat bildirib.

O əlavə edib ki, “Yaşamaq istəyirəm” layihəsinin təklifindən istifadə etməyən rusiyalı hərbçilərin taleyi Ukrayna Silahlı Qüvvələrinin Baş Qərargahının gündəlik xülasələrində öz əksini tapıb:

“İşğalın əvvəlindən etibarən bu günə qədər Rusiyanın itkiləri 134 100 hərbçi olaraq qiymətləndirilir”.

Qeyd edək ki, “Yaşamaq istəyirəm” Rusiya Federasiyasından olan hərbçilərin təhlükəsiz şəkildə əsirlikdə qalmaq üçün təslim olmasına köməyi nəzərdə tutan dövlət layihəsidir.