Türkiyənin hakim Ədalət və İnkişaf Partiyasının (AKP) Hatayı təmsil edən deputatı Hüseyn Yaymanın zəlzələ nəticəsində 11 qohumu həlak olub.

Bu barədə məlumatı deputatın özü açıqlayıb.

Onun sözlərinə görə, ailədə 9 uşaq olublar: “Onlardan 2-si - bir bacım və qardaşım həlak olub. Ümumilikdə zəlzələdə 11 qohumumu itirdim”.

Deputat ailəsinin Çamsarı kəndindəki evlərinin qarşısında çadır qurduğunu və orada qaldığını bildirib: “Mən burada maşında yatıram. Ailəm “kəndə gəl” deyir, lakin mən o xatirələrin olduğu evə baxa bilmirəm”.

H.Yayman bütün gününü isə zəlzələdən zərərgörən şəxslərə yardım çatdırılması işlərində iştirak etməyə həsr etdiyini açıqlayıb.

Xatırladaq ki, Türkiyədə fevralın 6-sı baş verən zəlzələ nəticəsində Hüseyn Yaymanın da ailə üzvlərinin dağıntılar altında qalması barədə məlumat yayılmışdı.