Hazırda ləğv prosesində olan “Texnikabank” ASC Xırdalan şəhərində yerləşən “AAAF park” yaşayış kompleksini inşa edən “AAAF-İnşaat” MMC-yə və Vahabova Təranə Əhməd qızına qarşı məhkəmə iddiası qaldırıb.

İddia Bakı Kommersiya Məhkəməsinin hakimi Nərmin Əhmədovanın icraatına verilib.

Bildirilir ki, məhkəmə iddiası zaminlik müqaviləsi üzrə mübahisələrlə bağlıdır.

Məlumat üçün bildirək ki, nizamnamə kapitalı 20 manat olan “AAAF-İnşaat” MMC 02.03.2005-ci il tarixində dövlət qeydiyyatına alınıb. Hüquqi ünvanı Xırdalan şəhəri 26-cı məhəllə, ev 199-da yerləşən MMC-nin direktoru Heydərov Tofiq Mirhəsən oğludur.

Qeyd edək ki, barəsində iddia qaldırılan “AAAF-İnşaat” MMC-nin hazırda dövlət büdcəsinə böyük həcmdə - 17 milyon 430 min 387 manat 28 qəpik vergi borcu var. Təxminən 2 il əvvəl “AAAF-İnşaat” MMC-nin vergi borcu 28 milyon manatdan çox idi. Belə görünür ki, son 2 ildə şirkət 10 milyon manatdan çox vergi borcunu büdcəyə ödəyib.

Onu da bildirək ki, Xırdalan şəhərində “AAAF” adı ilə çoxsaylı şirkət fəaliyyət göstərir.