Ermənistanda anti-Rusiya əhval-ruhiyyəsi günü-gündən artır.

Bu barədə "France-Presse" agentliyinin (AFP) məqaləsində yazılıb.

Fransa agentliyi qeyd edir ki, Rusiyanın 2022-ci ilin fevralında Ukraynaya təcavüzü keçmiş Sovet İttifaqı ölkələrində çaşqınlıq yaradıb. Moskvanın ənənəvi tərəfdaşlarını başqa ölkələrdə müttəfiq axtarmağa sövq edib və Ermənistan da istisna deyil.

Fransanın nüfuzlu nəşri İrəvan sakinlərinə istinad edərək yazır ki, indi bir çox ermənilər Ermənistanın KTMT-dən və Rusiyanın təsir dairəsindən çıxacağı günü arzulayırlar. 

Belə ki, İrəvan sakinlərindən biri AFP-yə deyib ki, Moskva etibarsız tərəfdaşdır və İrəvan öz müttəfiqlərini başqa yerdə axtarmalıdır: "Mən Ermənistanın KTMT-dən çıxacağı günü və Rusiyanın siyasi təsirini arzulayıram. Moskva çətin anda Ermənistana kömək etmədi".

Daha bir İrəvan sakini qeyd edib ki, Ermənistan NATO-ya daxil olmalıdır, orada real yardım ala bilər: "Rusiya bizə kömək etmir, onlar bizim dostumuz deyillər".

Bununla belə, məqalə müəllifləri qeyd edirlər ki, rəsmi İrəvanın bundan sonrakı kursu aydın deyil. Eyni zamanda, AFP-nin məlumatına görə, bir çox analitiklər hesab edirlər ki, Ermənistan hələlik KTMT-dən çıxmağı özünə rəva bilmir.