Dünyanın aparıcı analitik mərkəzlərindən biri olan İqtisadi Kəşfiyyat Qrupu (Economist Intelligence Unit - EIU) Rusiya-Ukrayna müharibəsinin başlamasından ötən son bir ildə dünya ölkələrinin bu müharibə ilə bağlı mövqeyinin necə dəyişdiyini araşdırıb.

Yeniavaz.com xəbər verir ki, aparılan araşdırma Rusiyaya dəstək verənlərin sayının yavaş-yavaş artdığını göstərir.

Bildirilir ki, 2022-ci ildə 29 ölkə Rusiyaya meyl edirdisə, indi bu rəqəm 35-ə yüksəlib. Qərbə meyl edən, ya da Rusiyanı fəal şəkildə pisləyən ölkələrin sayı isə 131-dən 122-yə düşüb.

EIU hesab edir ki, bu hal 2022-ci ilin sonlarında bir sıra inkişaf etməkdə olan iqtisadiyyatların daha neytral mövqeyə keçməsi ilə əlaqədardır.

Cənubi Afrika və Uqanda 2022-ci ildə bu mövzuda siyasi cəhətdən neytral olduqları halda, indi Rusiyaya meyilli ölkələr siyahısındadırlar. Bu arada Burkina Faso və Mali əvvəllər Rusiyaya meylli olduqları halda, indi Rusiyanı açıq şəkildə dəstəkləyirlər. Latın Amerikasında Boliviya 2023-cü ilə qədər neytral mövqedən Rusiyayönlü mövqeyə keçib.

Eyni zamanda, neytral ölkələrin sayı 32-dən 35-ə yüksəlib. Əvvəllər Qərbə meyilli bəzi ölkələr, o cümlədən Kolumbiya, Türkiyə və Qətər bu kateqoriyaya daxil olublar. Bu ölkələr hər iki tərəflə əməkdaşlıqdan iqtisadi fayda əldə etməyə çalışır. Banqladeş isə bunun əksinə olaraq neytral mövqedən Qərbə meyilli mövqeyə keçib.

EIU-nun hesabatında göstərilir ki, hazırda dünya üzrə istehsal olunan ümumi daxili məhsulun (ÜDM) 60,1%-i Rusiyaya qarşı olan ölkələrin payına düşür. ÜDM-nin 7,8%-i Qərb meyilli, 12%-i neytral mövqe tutan, 16,8%-i Rusiya meyilli, 3,3%-i isə Rusiyanı dəstəkləyən ölkələrin payına düşüb.

Hazırda dünya əhalisinin 30,7%-i neytral ölklərdə yaşayır. Bundan başqa dünya əhalisinin 27,5%-i Rusiya meyilli, 21%-i Qərb meyilli, 15,2%-i Rusiyaya qarşı olan, 5,6%-i isə Rusiyanı dəstəkləyən ölkələrdə yaşayırlar.

Məlumat üçün bildirək ki, EIU-nun hesabatında Azərbaycan və Ermənistan neytral, Gürcüstan isə Qərbə meyilli ölkə kimi göstərilib. Azərbaycana qonşu olan İran Rusiyanı dəstəkləyən, Qazaxıstan isə Rusiya meyilli ölkə kimi təqdim edilib.