Suraxanı rayonunun 100 min nəfərdən artıq sakini olan Hövsan qəsəbəsində yaşayanlar ərazidə bank filialının olmamasından şikayətçidir.

Qəsəbə sakinləri adından “Qafqazinfo”ya müraciət edən qəsəbənin ağsaqqalı, Suraxanı rayon Ağsaqqallar Şurasının üzvü Kəlpi İsgəndərov xeyli vaxtdır əhalinin bank xidmətləri almaqda çətinliklərlə üzləşdiyini bildirib: “Qəsəbəmizdə rəsmi olaraq 70 min nəfər qeydiyyatdadır. Lakin qeydiyyatda olmayan sakinləri də nəzərə alsaq, Hövsanda 100 min nəfərə yaxın insan yaşayır. Bununla belə uzun illərdir əhalimiz normal bank xidməti almaqda çətinlik çəkir, burada heç bir bank filialı və ya valyutadəyişmə məntəqəsi yoxdur, sakinlər tıxacda qalmaqla, uzun yol qət etməklə şəhərin mərkəzinə və digər ərazilərə gedərək bank xidmətlərindən istifadə etmək məcburiyyətində qalırlar”.

Kəlpi İsgəndərov qeyd edib ki, əslində son bir neçə ilədək Hövsanda bank filialı fəaliyyət göstərib: “Əvvəllər qəsəbəmizdə bank filialları da, valyutadəyişmə məntəqələri də olub. Lakin 2015-ci il devalvasiyasından sonra heç bir bank xidməti göstərilmir, valyutadəyişmə məntəqələri də bağlandı. Hazırda Hövsana ən yaxın bank filialı Əmircan qəsəbəsində yerləşir ki, oraya da 17 kilometr məsafədir. Biz başa düşürük ki, kommersiya bankları öz mənfəətlərini düşünür, buna uyğun fəaliyyət istiqamətləri seçirlər. Lakin 150 min nəfərə yaxın insanın da vəziyyətini anlamaq lazımdır və müvafiq dövlət qurumları bu məsələni nəzarətə götürməlidir”.

Qəsəbənin ağsaqqalı əlavə edib ki, mövcud vəziyyətdən ən çox əziyyət çəkənlər əhali ilə yanaşı, sahibkarlıq subyektləridir: “Mənim 81 yaşım var, həm də sahibkarlıq fəaliyyəti göstərirəm. Bu səbəbdən tez-tez banka müraciət etməli oluram. Həm də Hövsanda MİDA-nın böyük bir yaşayış kompleksi tikilib və minlərlə insan orada yaşamağa başlayıb, ətraf yaşayış massivləri də günbəgün böyüyür, bütün bunlar qəsəbəmizdə bank filialının olmasını zəruri edir. Lakin böyük bir ərazidə heç bir bank filialının olmaması bizə böyük çətinliklər yaradır. Dövlət qurumlarından, xüsusilə Mərkəzi Bank rəhbərliyindən xahiş edirik ki, bu məsələyə əncam çəksinlər”.