Xəbər verdiyimiz kimi, xuliqanlıq ittihamı ilə məhkum edilmiş tanınmış aktyor, rejissor və ssenarist Rza Rzayevin kassasiya şikayəti icraata götürülüb. İş Ali Məhkəmənin hakimi Nazim Mövsümovun sədrliyi ilə araşdırılacaq.

Şikayətdə R.Rzayevə qarşı irəli sürülmüş ittihamın əsassız olduğu qeyd edilərək bəraət qərarı çıxarılması istənilib.

Məsələ ilə bağlı Milli Məclisin deputatı Aqil Abbas AZXEBER.COM-a açıqlama verib.

O prosesi diqqətlə izlədiyini bildirib:

“Rzanın həbsinə münasibətimin həddən artıq pis olduğunu dəfələrlə demişəm, yenə də deyirəm. Azadlığa çıxması üçün də təşəbbüs göstərmişəm, göstərəcəm də. Tək mən yox, bəzi deputatlar da mənə qoşulub.

Fazil Mustafa və Qüdrət Həsənquliyev ilə birlikdə imkanımız daxilində müraciətlərimiz olacaq”.

Deputat Rza Rzayev azadlığa çıxacaqmı sualına da münasibət bildirib:

“Mən bütün instansiyalara ədaləti bərpa etmək üçün çağırış edirəm. Ali Məhkəməyə, hörmətli İman Kərimova işə humanizm prinsiplərindən yanaşması və ədalətli qərar çıxarması üçün müraciətimizi çatdıracağıq”.

Qeyd edək ki, Rza Rzayev millət vəkili Aqil Abbasın romanı və ssenarisi əsasında çəkilmiş “Dolu” filmində rol aldığı “Drakon” obrazı ilə məşhurlaşıb.

Xatırladaq ki, Bakı Apellyasiya Məhkəməsi onu Cinayət Məcəlləsinin 221.3-cü ((Xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddəsi ilə təqsirli bilərək, barəsində 2 il müddətinə azadlıqdan məhrumetmə cəzası çıxarıb.