Rusiya Ədliyyə Nazirliyi xarici agentlərin reyestrini genişləndirərək ona daha 9 nəfər əlavə edib.

"Unikal" xəbər verir ki, müvafiq siyahı qurumun rəsmi saytında dərc olunub.

Əldə edilən məlumata görə, jurnalistlər Sergey Kovalçenko və Yelena Malaxovskaya xarici agent kimi tanınıblar. Reyestrə aktivist Andrey Rudoy, “Titushki in Krasnodar” Teleqram kanalının müəllifi Vitali Votanovski və media meneceri Aider Mujdabayev də əlavə edilib.

Üstəlik, siyahıya fond rəhbəri Olqa Romanova və Voloqda vilayətinin qanunvericilik məclisinin keçmiş deputatı Yevgeni Domojirov, Noqay milli hərəkatının nümayəndəsi Ənvər Kurmanakayev, eləcə də “Qazprombank”ın keçmiş vitse-prezidenti və uzun müddət “Qazprom”un mətbuat xidmətinin rəhbəri olmuş İqor Volobuyev də salınıblar.