“Rusiya-Ukrayna müharibəsi başlayandan 8 mindən çox ukraynalı hərbçi Almaniyada təlim keçib”.

Bu barədə Almaniya Müdafiə Nazirliyinin Ukraynaya yardımın əlaqələndirilməsi üzrə işçi qrupunun rəhbəri general Kristian Freydinq “Stuttgarter Zeitung” və “Stuttgarter Nachrichten” qəzetlərinə müsahibəsində bildirib.

 “Bundesver (Almaniya Silahlı Qüvvələri nəzərdə tutulur) tərəfdaşlarımızla birlikdə artıq Almaniyada 8 mindən çox ukraynalı əsgərə təlim keçib”, - Freydinq bildirib.

Qeyd edək ki, iyul ayında Bundesver 5 min ukraynalının təlim keçdiyini bildirmişdi.

Digər tərəfdən, Almaniya Müdafiə Nazirliyinin məlumatına görə, 2023-cü ilin sonuna kimi 10 min ukraynalı əsgərin Almaniyada təlim keçəcəyi gözlənilir.

Xatırladaq ki, Polşa və Almaniya da daxil olmaqla bir sıra Aİ ölkələrində Ukrayna hərbçiləri üçün təlim missiyası 2022-ci ilin oktyabrında Aİ ölkələri tərəfindən təsdiqlənib.

Söhbət komandanlıq heyətinin hazırlanmasından, maddi-texniki təminatın təşkili, radiasiya, bakterioloji və kimyəvi mühafizənin təşkili üzrə təlimlərdən gedir. Missiyanın mandatı iki ildir. Aİ Hərbi Komitəsinin rəhbəri general Robert Brigerin daha əvvəl “Welt” qəzetinə verdiyi məlumata görə, bu il Avropa İttifaqı 30 min ukraynalı hərbçi hazırlayacaq.