Kiyev vilayətinin Çayki kəndində Ukrayna Silahlı Qüvvələrinin baş komandanı Valeri Zalujnının köməkçisi Gennadi Çastyakov qumbaranın partlaması nəticəsində həlak olub.

Bu barədə “Ukrayinska Pravda” hüquq-mühafizə orqanlarındakı mənbələrə istinadən məlumat yayıb.

Məlumatı Zalujnının özü də təsdiqləyib:

“Ukrayna Silahlı Qüvvələri üçün və şəxsən mənim üçün izaholunmaz ağrı və ağır itki. Bu gün faciəvi şəraitdə, öz ad günündə köməkçim və yaxın dostum, mayor Gennadi Çastyakov dünyasını dəyişdi. Hədiyyələrin birində naməlum partlayıcı qurğu işə düşüb. Gennadinin həyat yoldaşı və dörd övladı qalıb. Ailəsinə dərin hüznlə başsağlığı verirəm”.

Nəşrin mənbəsi bildirib ki, polis mənzilə baxış zamanı daha 5 ədəd bütöv qumbara tapıb.