2023-cü ilin fevralında baş vermiş dağıdıcı zəlzələlər nəticəsində Türkiyəyə dəyən ümumi zərər 110 milyard dollar təşkil edib. 

Modern.az-ın məlumatına görə, bunu ölkənin ekologiya və şəhərsalma naziri Mehmet Özhaseki bildirib. 

"Fevralın 6-da baş vermiş zəlzələlərdən ümumi itkilərimiz 110 milyard dollar həcmində qiymətləndirilir. Ölkəmizin ərazisinin 66 faizi, vətəndaşlarının 71 faizi birinci və ikinci dərəcəli zəlzələ riski altındadır", - nazir parlamentdə müzakirələr zamanı deyib. 

Fevralın 6-da Türkiyənin cənub-şərqində 7,7 və 7,6 bal gücündə zəlzələlər baş verib. Yeraltı təkanlar geniş ərazidə və qonşu ölkələrdə hiss olunub. Türkiyə rəsmiləri daha əvvəl zəlzələlərin vurduğu ziyanın 100 milyard dolları keçdiyini bildirmişdi. Bu zəlzələlər nəticəsində təxminən 50 min nəfər həlak olub. 

Fevral zəlzələləri respublikanı zəlzələyə davamlı yaşayış evlərinin tikintisinə diqqət yetirərək şəhərsalma siyasətinə yenidən baxmağa sövq etdi. Belə planlardan biri seysmoloqların 7 və ya daha yüksək bal gücündə zəlzələ olacağını proqnozlaşdırdığı İstanbula aiddir. 

"Biz İstanbulu mümkün zəlzələyə hazırlamaq üçün yol xəritəsi cızmışıq. Yol xəritəsi beş il ərzində 1,5 milyon binanın təmirini nəzərdə tutur", - nazir deyib. Onun sözlərinə görə, ilkin mərhələdə 300 minə yaxın evin tikintisi nəzərdə tutulan ərazilər artıq seçilib. 

Özhaseki daha əvvəl bildirmişdi ki, İstanbulda təxminən 6 milyon ev və 1,5 milyon iş yeri var, onlardan 1,5 milyon mənzil risk altındadır. Nazirin sözlərinə görə, 2024-cü ilin əvvəlində hakimiyyət İstanbulun mənzil fondunun yenilənməsi planını həyata keçirməyə başlayacaq. 

1999-cu ilin avqustunda Anadolu və Avrasiya tektonik plitələrinin qovşağında yerləşən İstanbul ərazisində 7,6 bal gücündə zəlzələ baş verib. Rəsmi məlumatlara görə, o zaman 17,2 min nəfər, qeyri-rəsmi məlumatlara görə - təxminən 40 min nəfər ölüb, daha 45 min nəfər yaralanıb. 

Türkiyə ərazisinin 66%-i seysmik risk zonasındadır.