Rusiyada Sankt-Peterburqun şəhər dumasına və şəhərdaxili dairə şurasına keçirilən seçkilərdə azərbaycanlı namizəd Elşən Həmzəyev qalib gəlib.

Deputat seçilməsi ilə bağlı Modern.az-a danışan Elşən Həmzəyev bildirib ki, o, bundan əvvələ də deputat kimi fəaliyyət göstəribl:

“2014-cü ildən bu ərazinin deputatıyam. Sadəcə, dünən ikinci dəfə növbəti 5 il üçün deputat seçildim. İvanovski dairəsində yaşadığım üçün namizədliyimi də bu dairədən irəli sürdüm və qalib gəldim. Onu da deyim ki, Sankt-Peterburqda 250 minə yaxın azərbaycanlı yaşayır”.

Elşən Həmzəyevin sözlərinə görə, Rusiyada azərbaycanlıların deputat seçilməsi boşuna baş vermir:

“Sözün düzünü desək, azərbaycanlıların deputat seçilməsinə ruslar o qədər də yaxşı baxmır. Onlar öz millətlərini sevirlər və seçkilərdə də çalışırlar ki, özlərininkinə səs versinlər. Rusiyada deputat olmaq üçün müəyyən işlər görülməlidir. Boşu-boşuna rus xalqı azərbaycanlı namizədləri seçib səs vermirlər. Hər hansı işlər görülür. Azərbaycanlı olaraq rusların ərazisində gördüyüm işlər var. Bu işlərin hamısını telefonda sadalamaq olmur”.

Azərbaycanlı deputat gələcək planlarından da söz açıb:

“Əgər alınarsa, planımızda Rusiya Dumasının deputatı olmaq da var. Alınmazsa belə, burada işlərimizi davam etdirəcəyik. Sankt-Peterburq balaca şəhər deyil. 6 milyon əhalisi var. Deputatı olduğum dairənin isə 60 minə yaxın sakini var. Ümumi rayonumuzun 657 minə yaxın sakini var”.

Qeyd edək ki, Elşən Həmzəyevin rəqibləri arasında iki erməni əsilli namizəd də olub.

Qeyd edək ki, 1972-ci ildə Astarada doğulan Elşən Həmzəyev orta məktəbi bitirdikdən sonra Rusiyaya gedib. Elşən Həmzəyev əvvəlcə M.A.Bonç-Brueviç adına Sankt-Peterburq Dövlət Telekommunkasiya İnstitutun bitirib, daha sonra isə ikinci təhsil alaraq hüquqşünas ixtisasına yiyələnib. 30 ildir Rusiyada yaşayan həmyerlimiz 1999-cu ildən tikinti və əmlak məsələləri ilə məşğul olan "Savalan" şirkətlər qrupunun rəhbəridir.


Paylaş: