2022/23 mövsümünün ən gəlirli futbol klubu məlum olub.

Bu barədə “Deloitte” beynəlxalq konsaltinq şirkəti məlumat yayıb.

Belə ki, şirkət 2022/23 mövsümünün nəticələrinə əsasən ən gəlirli Avropa klublarının reytinqini tərtib edib.

Reytinqə görə, İspaniyanın “Real Madrid” klubu 831 milyon avro gəlirlə birinci yeri tutub. İkinci yerdə ötən mövsüm reytinqə başçılıq edən İngiltərə Premyer Liqası və Çempionlar Liqasının qalibi “Mançester Siti” klubu (826 milyon avro) qərarlaşıb. Siyahının üçüncüsü isə 802 milyon avro gəlirlə Fransanın “Pari Sen-Jermen” klubu olub.

Avropanın ən yaxşı 20 klubunun gəlirləri oyunlardan və reklamlardan gələn gəlirlər də daxil olmaqla, 14% artaraq rekord məbləğə - 10,5 milyard avroya çatıb.

Həmçinin kommersiya gəlirləri 2015/16-cı ildən bəri ilk dəfə olaraq yayım gəlirlərini üstələyərək ən böyük qazanc mənbəyinə çevrilib.

Ən gəlirli klublar onluğuna həmçinin “Barselona” (800,1 milyon), “Mançester Yunayted” (745,8 milyon), “Bavariya” (744 milyon), “Liverpul” (682,9 milyon), “Tottenhem” (631,5 milyon), “Çelsi” (589,4 milyon) və “Arsenal” (532,6 milyon) klubları da daxil olub.