ABŞ-nin Alabama ştatında ölkə tarixində ilk dəfə məhkum azotdan istifadə edilərək edam olunub.

Bu barədə məlumatı “Assosoated Press” yayıb. 

Sözügedən şəxs 1988-ci ildə sifarişlə qətl törədən 58 yaşlı Kennet Yucin Smit olub. Smitin vəkilləri azotla edamı qəddar adlandırıblar və bu üsulla müvəkillərinin üzərində “sınaq” aparıldığını qeyd ediblər. 

Qeyd edək ki, K. Smit Çarlz Sennet adlı keşişin sifarişi ilə onun həyat yoldaşını qətlə yetirib. Keşişin məqsədi sığorta pulu əldə etmək və bununla borclarını ödəmək olub. İstintaq məlumatına görə, Smit şəriki ilə bu cinayətə görə 1000 dollar əldə edib. 

Smit ilk olaraq 1989-cu ildə mühakimə edilsə də, apellyasiya şikayətindən sonra məhkəmənin qərarı ləğv edilib. O, daha sonradan 1996-cı ildə yenidən sözügedən işlə bağlı mühakimə edilib və edam cəzasına məhkum edilib. Edam prosesi 2022-ci ildə inyeksiya yolu ilə baş tutmalı olsa da, iynə üçün uyğun damar tapılmadığından proses təxirə salınıb. Kennet Yucin Smit və vəkilləri məhkəməyə müraciət edərək edamın keçirilməməsinə çalışıb. Lakin məhkəmə vəsatəti təmin etməyib. Smitin vəkilləri bu edam növünü qəddar adlandırıb. 

Qeyd olunur ki, azotla edam cəzasına Alabama, Oklahoma və Missisipidə icazə verilsə də, bu günə qədər istifadə edilməmişdi.