Mumbayda “casus” olmaqda şübhəli bilinən göyərçin “Bai Sakarbai Dinshaw Petit Hospital for Animals”nın baytarlıq klinikasından buraxılıb.

Bu barədə Hindistanın “Press Trust of India” agentliyi polisin bəyanatına istinadən məlumat yayıb.

Bildirilir ki, yanvarın 30-da polisdən icazə alındıqdan sonra quş təbiətə buraxılıb.

Göyərçin 2023-cü ilin may ayında Chembur limanında (Mumbay şəhəri ətrafında) tutulub. Quşun pəncələrinə iki üzük bağlanmışdı - biri misdən, digəri alüminiumdan. Üzüklərin üzərində, ehtimal edilir ki, Çin dilində yazılar var idi. Yerli polis göyərçindən Çinə casusluq etmək üçün istifadə oluna biləcəyindən şübhələnib. Quş Mumbaydakı baytarlıq klinikasına göndərilib və orada həbs edilib.

Polis daha sonra göyərçinin Tayvanın açıq sularında yarışdığını aşkar edib. Belə yarışların birində o, ölkədən uçaraq Hindistana enib.

“The Guardian”ın qeyd etdiyi kimi, bu, Hindistanda göyərçinlərin saxlanılması ilə bağlı ilk hadisə deyil. Məsələn, 2020-ci ildə Kəşmirdə yerli sakinlər pakistanlı balıqçıya məxsus göyərçini tutaraq polisə təhvil veriblər. Onlar deyiblər ki, quşun ayaqlarından birinə yazı olan üzük olub və o, şifrələnmiş mesajlar ötürüb. İstintaq göstərib ki, quş casus deyil, sadəcə olaraq ölkələr arasındakı sərhədi keçib. Nəticədə o, sərbəst buraxılıb.

Bundan əlavə, 2016-cı ilin oktyabrında Pəncab əyalətində Hindistan sərhədçiləri Pakistandan uçan göyərçin tutublar. Onun Baş nazir Narendra Modini hədələyən açıqça daşıdığı bildirilir.