Türkiyənin pilotsuz təyyarə istehsalçısı “Baykar” Ukraynadakı zavodun tikintisini bir il ərzində başa çatdırmağı gözləyir.

Bu barədə “Reuters” şirkətin baş direktoru Haluk Bayraktara istinadən məlumat yayıb.

“Zavodumuz tikilməkdədir. Tikintini başa çatdırmaq üçün bizə təxminən 12 ay lazımdır, sonra biz daxili texnologiyaya, avadanlıqlara və təşkilati struktura keçəcəyik”, - Haluk Bayraktar Ər-Riyadda keçirilən Ümumdünya Müdafiə Sərgisində deyib.

Nəşr yazır ki, şirkətin baş direktoru zavodda 500-ə yaxın işçinin çalışacağını bildirib:

“Şirkətin ildə təxminən 120 dron istehsal edəcəyi gözlənilir, lakin bunların TB2 və ya TB3 modellərindən hansı olacağı hələ ki, bəlli deyil”.

“Baykar” şirkəti Ukraynadakı layihələrə, o cümlədən dron istehsalı zavodunun tikintisinə təxminən 100 milyon dollar sərmayə qoymağı planlaşdırdığını açıqlayıb.