Dövlət ittihamçısı Rusiyanın Volqoqrad şəhərində məscidin yaxınlığında Quranı yandırmaqda təqsirləndirilən Nikita Juravelin 3 il 6 ay müddətinə azadlıqdan məhrum edilməsini və cəzasını ümumi rejimli islah koloniyasında çəkməsini istəyib.

TASS xəbər verir ki, bu barədə prokurorluğun nümayəndəsi məlumat verib.

“Hökmləri qismən əlavə etməklə, nəhayət, ümumi rejimli islah koloniyasında çəkilməsi üçün üç il altı ay azadlıqdan məhrumetmə cəzası təyin edəcəyik”, - prokurorluğun nümayəndəsi qeyd edib.

Digər tərəfdən, Qroznının Visaitovski rayon məhkəməsi Nikita Juravel barəsində hökmün fevralın 27-də elan ediləcəyini bildirib.

Qeyd edək ki, Juravel Rusiya Cinayət Məcəlləsinin iki maddəsi ilə ittiham olunur: ibadət və dini mərasimlər üçün nəzərdə tutulmuş yerlərdə törədilən dindarların hisslərini təhqir etmək və bir qrup şəxs tərəfindən əvvəlcədən əlbir olaraq törədilən dini nifrət zəminində xuliqanlıq. O, təqsirini qismən etiraf edir.

Xatırladaq ki, Juravel 2023-cü ilin mayında Volqoqradda saxlanılıb. Cinayət işi istintaq üçün Rusiya İstintaq Komitəsinin Çeçenistan Respublikası üzrə İstintaq İdarəsinə verilib. Daha sonra o, Qroznı istintaq təcridxanasına göndərilib.