“Ermənistan hələ də Kollektiv Təhlükəsizlik Müqaviləsi Təşkilatından (KTMT) çıxmayıb, təşkilatdan çıxmağın mümkün nəticələri dövlət sirridir”.

TASS xəbər verir ki, bu barədə Respublika Silahlı Qüvvələrinin Baş Qərargah rəisi, general-leytenant Edvard Asryan keçirdiyi brifinqdə bildirib.

“Biz hələ KTMT-dən çıxmamışıq, sualınızın cavabı isə dövlət sirridir”, - o, jurnalistin KTMT-dən çıxmağın mümkün nəticələri ilə bağlı sualını cavablandırarkən deyib.

Silahlı Qüvvələrin Baş Qərargah rəisi həmçinin Rusiya silahlarının tədarükü ilə bağlı şərh verməkdən imtina edərək, bu prosesin də dövlət sirri olduğunu qeyd edib.

Xatırladaq ki, son zamanlar Ermənistanda KTMT ilə bağlı suallar yaranıb. Baş nazir Nikol Paşinyan Minskdə keçirilən KTMT sammitində iştirak etməyib, həmçinin respublikanın bu təşkilatda iştirakını dayandırdığını bəyan edib. Rusiya Xarici İşlər Nazirliyi bildirib ki, İrəvanın KTMT tədbirlərində iştirak dinamikası azalıb və bu, dost erməni xalqının maraqlarına cavab vermir.