Amerikalı aktrisa Merilin Monronun keçmiş həyat yoldaşı Artur Millerlə yaşadığı malikanə satışa çıxarılıb.

Bu barədə “New York Post” (NYP) qəzeti məlumat yayıb.

Məlumata görə, Hemptonsda (Nyu-York) yerləşən qəribə dəyirman evi 12,5 milyon dollara satılır.

Malikanə sonuncu dəfə 2016-cı ildə satılıb, o zaman onun qiyməti 8,5 milyon dollar olub.

Əvvəllər işləyən yel dəyirmanından yalnız yelkənli fasad qalıb, içəridə isə yataq otağı və səkkizguşəli qonaq otağı var. Sidr ağacları ilə döşənmiş yuxarı mərtəbədə hələ də dəyirman maşınları yerləşir.

Keçmiş yel dəyirmanı ötən əsrin ortalarında əvvəlki sahibi, “Faberge” ətir brendinin banisi Samuel Rubin tərəfindən evə çevrilib.

Əsas bina 1830-cu ildə tikilib və 120 kvadratmetr ərazini tutur. Üç mərtəbədə yataq otağı, mətbəx və hamam var. Rieltorlar qeyd edirlər ki, alıcı kompleksi 1,9 min kvadratmetr sahəsi olan geniş evlə tamamlaya bilər. Sahibinin ixtiyarında olan iki hektar torpaq da buna icazə verə bilər.