Beyin insan bədəninin ən mürəkkəb və maraqlı orqanlarından biridir. Optimal qidalanma aldıqda, tam gücü ilə işləyir və tez düşünməyə imkan verir.
Bununla belə, pəhrizinizdə əsas qida maddələri yoxdursa, konsentrasiyada çətinlik çəkə bilərsiniz, yaddaş itkisi və ya əhvalınızın dəyişməsi halları ola bilər.
“EatingWell” xəbər verir ki, tədqiqatçılar beyin sağlamlığı üçün qida maddələrini öyrənmək barədə çox vaxt sərf ediblər.
Bildirilir ki, burada əsas rol oynayan, əsasən, omeqa-3 yağ turşuları, eikosapentaenoik turşu (EPA) və dokosaheksaenoik turşudur (DHA).
Qeyd olunur ki, onlar koqnitiv sağlamlığın qorunmasında mühüm rol oynayırlar, lakin insan orqanizmi onları öz-özünə istehsal edə bilməz. Onları pəhrizimizdən almalıyıq və balıqlarda bu omeqa-3-lərin çoxu var.
Neyroloqların fikrincə, beyin sağlamlığı üçün ən yaxşı 5 balıq növü bunlardır:

1. Siyənək balığı
100 qramlıq siyənək balığının tərkibində 909 milliqram EPA və 1100 mq DHA var.

2. Skumbriya
Bu balıq yüksək miqdarda EPA və DHA ehtiva edir. Belə ki, 100 qramlıq skumbriya porsiyasında təxminən 898 mq EPA və 1400 mq DHA var.

3. Qızılbalıq
100 qramlıq qızılbalıqda təxminən 862 mq EPA və 1100 mq DHA var. Həmçinin qeyd olunur ki, sadalanan faydalı tərkib üçün balığın təzə, dondurulmuş və ya konservləşdirilmiş olmasının fərqi yoxdur.

4. Sardina
100 qramlıq sardina porsiyası təxminən 473 mq EPA və 509 mq DHA ehtiva edir. Bundan əlavə, sardina ürək-damar xəstəliklərinin müalicəsində kömək edə biləcək kalsium, kalium, maqnezium və sink kimi iltihab əleyhinə və ürəyi qoruyan xüsusiyyətlərə malik qidaları ehtiva edir.

5. Tuna
Konservləşdirilmiş tuna balığı sərfəli və dadlı seçimdir. Belə ki, 100 qramlıq konservləşdirilmiş tuna balığı təxminən 25 mq EPA və 197 mq DHA ehtiva edir.