Bakıda yerləşən ən böyük tibb müəssisələrindən biri - “Caspian International Hospital”ın rəhbərliyində dəyişiklik olub. 

Hospitalın uzman androloq-uroloqu Fariz Cəbiyev müəssisənin direktoru təyin edilib. 

Bu təyinata qədər o, direktorun tibbi məsələlər üzrə müavini vəzifəsində çalışırdı. 

F.Cəbiyev 1984-cü ildə Bakıda doğulub. 2007-ci ildə Azərbaycan Tibb Universitetini fərqlənmə ilə bitirərək Türkiyə Cümhuriyyətinin İzmir şəhərində, Ege Universitetinin Urologiya Şöbəsinə həkim-rezident olaraq işə qəbul olunub. 2013-cü ildə fərqlənmə və icra olunan əməliyyatların yüksək sayı ilə həmin bölümdən məzun olub. 2013-cü ildən bu günə kimi Azərbaycanda bir cox özəl və dövlət müəssisələrində həkim-uroloq kimi fəaliyyət göstərib.

Bir çox beynəlxalq və ölkə daxili elmi konfranslarda məruzələr edib. Evlidir, 2 övladı var.

“Badam Medical Center”də isə Fuad Məmmədova etimad göstərilib. Bundan əvvəl direktorun Marketinq və kommunikasiyalar üzrə müavini vəzifəsində çalışmış F.Məmmədov direktor vəzifəsinə yüksəldilib.

Fuad Məmmədov 1985-ci ildə Bakıda doğulub. 2015-ci ildə Digital Marketing Institute bitirib. “Şəkər Villası” qəzetində redaktor, “Sevimli” jurnalında baş redaktor, “Andrew’s Ties” şirkətində Marketinq və kommunikasiya departamentinin rəhbəri, “DSC”, “Kibrit” şirkətlərində şöbə rəisi vəzifələrində çalışıb. “Azercell”in mobil saytını və xidmətlərini idarə edib. Evlidir, 1 övladı var.