Lionel Messinin də formasını geyindiyi "İnter Mayami" KONKAKAF Çempionlar Kubokunda 1/4 final mərhələsinin ilk oyununa çıxıb. 

Komanda "Monterrey"lə qarşılaşıb. Oyun Amerikanın Fort Lauderdeyl şəhərindəki "Çeyz" stadionunda  keçirilib. “İnter Mayami” öz meydanında Meksika təmsilçisinə 1:2 hesabı ilə uduzub. 

19-cu dəqiqədə "İnter Mayami"nin argentinalı müdafiəçisi Tomas Avileş hesabı açıb. 65-ci dəqiqədə meydan sahiblərinin yarımmüdafiəçisi David Ruiz ikinci sarı vərəqə alaraq meydandan qovulub. Matçın 69-cu dəqiqəsində qonaqların argentinalı yarımmüdafiəçisi Maksimiliano Mesa hesabı bərabərləşdirib. 89-cu dəqiqədə Mesanın ötürməsindən qələbə qolunu digər argentinalı yarımmüdafiəçi Xorxe Rodriqes vurub. 

Messi zədədən yeni qayıtdığı üçün bu oyunda iştirak etməyib. 

Bu komandalar arasında cavab matçı aprelin 11-də keçiriləcək.