Almaniya Prezidenti Frank-Valter Ştaynmayer Türkiyəyə səfəri zamanı ölkənin İstanbuldakı konsulluğunda qonaqlara 60 kiloqram dönər paylayıb.

Bu barədə Türkiyə KİV-ləri məlumat yayıb.

Bu yeməyin iki ölkəni birləşdirdiyini bildirən Almaniya lideri, “Dönər artıq Almaniyanın milli yeməyinə çevrilib. Almaniyada heç bir “fast food” yeməyi dönərdən çox satılmır”, - deyib.

Daha sonra o, manqal piştaxtasına keçib kolbasa bişirib.

Qeyd olunur ki, onun səfəri Almaniya və Osmanlı imperiyalarının müttəfiq olduğu Birinci Dünya Müharibəsinin bitməsindən 10 il sonra bərpa edilən iki ölkə arasında diplomatik əlaqələrin 100 illiyinə təsadüf edir.