Sentyabrın 27-dən, Azərbaycan ordusunun işğal edilmiş torpaqlarımızı azad etmək üçün Qarabağda döyüş əməliyyatlarına başladığı gündən bu yana qardaş ölkə Türkiyə bütün səviyyələrdə ölkəmizə güclü dəstəyini nümayiş etdirməkdədir. Türkiyə prezidenti Rəcəb Tayyib Ərdoğanın, xarici işlər naziri Mövlut Çavuşoğlunun, müdafiə naziri Hulusi Akarın və digər dövlət, hökumət rəhbərlərinin dəstək bəyanatları ilə yanaşı ictimaiyyət, yerli bələdiyyələr və müxtəlif dərnəklər, bütövlükdə türk xalqı Azərbaycanı bu haqlı savaşında dəstəklədiklərini nümayiş etdirirlər.
Bu günlərdə Türkiyənin hər yerində Azərbaycana dəstək üçün çoxsaylı aksiyalar keçirilir. Virtualaz.org Türkiyə mətbuatına istinadən xəbər verir ki, İstanbul Samsun Dərnəkləri Federasiyası Azərbaycan üçün «İki dövlət bir millət — Azərbaycan» dəstək proqramı təşkil edib. Federasiyanın prezidenti Erol Türkoğlu deyib ki, bununla dünya ictimaiyyətinə qardaş Azərbaycanın ədalətli mübarizəsinin yanında olduğumuzu bildirirlər.
Çoxsaylı qonaqların iştirak etdiyi tədbir şəhidlərin xatirəsini yad edilməsi ilə başlayıb. Ardından Türkiyə və Azərbaycan himniləri oxunub. Azərbaycan əsgərləri üçün dualar edildikdən sonra qurban kəsilib.
E.Türkoğlu bildirib ki, qurban Azərbaycan əsgərlərinin qanı axıdılmasın deyə kəsilib: «Ermənistan Azərbaycanın 20 faiz torpaqlarını işğal edib. 1 milyondan çox qaçqın və köçkünü var. Azərbaycan öz torpaqlarını müdafiə edir. Biz Ermənistanın hücumlarını şiddət və nifrətlə qarşılayırıq. Azərbaycan və Türkiyə bir millət iki dövlət olaraq mübarizəsini davam etdirəcəklər. Xocalıda günahsız insanlar - qocalar, uşaqlar qətlə yetirilən zaman susanlar indi haqq-ədalət dəm vururlar. Azərbaycan öz torpaqlarını qoruyur. Qarabağ Azərbaycana məxsusdur. Qardaş ölkənin ədalətli mübarizəsində yanında olacağımızı bütün dünyaya bəyan edirik.

Türkiyənin Van bölgəsində isə Van İnsan hüquqları və Azdlıqlarına Yardım dərnəyinin rəhbəri Azərbaycanı dəstəkləmək üçün şəhər ərazisində avtomobillərlə yürüşə çıxıblar. Avtomobillər Türkiyə və Azərbaycan bayraqları ilə bəzədilib. Azərbaycana dəstəyini nümayiş etdirənlər bəyanat imzalayıblar və Ermənistanın dinc əhaliyə qarşı hücumlarını pisləyiblər. Bəyanatda vurğulanıb ki, Ermənistanın hücumları bölgədə sülhə təhdiddir: «Bizlər hər zaman olduğu kimi ində də Azərbaycanın yanındayıq. Ermənistanın təcavüzünə beynəlxalq ictimaiyyət illərdir ikili standart nümayiş etdirir.
İstanbulda da 100 dən çox avtomobilin qatıldığı aksiyada Azərbaycanla bağlı şüarlar səsləndirilib. Aksiya iştirakçıları Azərbaycanın yanında olduqlarını bildiriblər,






Paylaş: