Keçən ilin oktyabr ayından etibarən Fransa Prezidenti Emmanuel Makronun ideologiyası İslam əleyhinə yönəlib. Onun bu yaxınlarda tətbiq etdiyi siyasətlə ölkədə populist atmosfer yaranıb.

Bu barədə Fransanın sosiologiya elmləri üzrə professoru Rafael Liogier “Anadolu” agentliyinə müsahibəsində deyib:

“Makronun nazirləri İslam əleyhinə və ifrat sağçı siyasətə keçdilər. O, mühitindən təsirlənir və seçkilər yaxınlaşdıqca ölkədəki İslamla bağlı problemlərdən narahat olduğunu göstərmək istəyir”.

Liogierin sözlərinə görə, müsəlmanların Fransa cəmiyyətini dəyişdirməyə çalışdıqları fikri ölkədə gündəmə gətirilir, buna görə müsəlmanlara qarşı müharibə istənilir. Hicab kimi məsələlər terrorla əlaqəli olmasa da, ümummilli problem halına gətirilir. Ölkədəki terror hücumlarının təşkilatçılarının İslamla əlaqəsi yoxdur, lakin buna baxmayaraq, hücumların İslamdan qaynaqlandığı deyilir. Makron müsəlmanları terrorçularla əlaqələndirməyə çalışır.

O qeyd edib ki, Makron və ətrafı cəmiyyətin “islamlaşması”ndan narahatdır.

“1930-cu illərdə yəhudilərə edilənlərlə bu gün müsəlmanlara qarşı edilənlər arasında ortaq bir nöqtə var. Məhəmməd Peyğəmbərə çəkilən karikaturalar 1930-cu illərdə həddindən artıq sağ və ya nasist alman jurnallarında yəhudilər haqqında çəkilənlərə bənzəyir”.


Paylaş: