Hazırda Üçtərəfli Bəyanatda Bakı-Moskva-Ankara danışıqlarının yekunu olaraq reallaşmasına ən yaxın olan məsələ Zəngəzur dəhlizinin istifadəyə verilməsidir. Bəzi məlumatlara görə, ötən həftə Avrasiya İttifaqının Rusiyanın Kazan şəhərində keçirilən toplantısı zamanı Ermənistanın baş naziri Nikol Paşinyan gizli şəkildə “Zəngəzur danışıqları”nda iştirak edib. Seçkilərə görə hələlik erməni ictimaiyyətindən gizli saxlanılan görüşdə vacib razılaşmalar əldə edilib. Daha doğrusu, Paşinyan fakt qarşısında qoyulub. Çünki, regionun yeni geosiyasi və geoiqtisadi xəritəsi Azərbaycan-Türkiyə-Rusiya triosu tərəfindən cızılır.

Bunu Moderator.az-a açıqlamasında Bakı Politoloqlar Klubunun sədri Zaur Məmmədov deyib.

“Ehtimal olunur kı, 2021-ci ilin dekabrın 1-dən, ən geci 1 yanvar 2022 -ci ildən Azərbaycanı Naxçıvanla birləşdirən Zəngəzur avtomagistralı tam hazır olacaq. Təxminən eyni vaxtda Ermənistandan İrana və Rusiyaya nəqliyyat yolu da açıla bilər. Bununla da Üçtərəfli Bəyanata uyğun olaraq, ilkin mərhələdə Azərbaycanın əsas hissəsi ilə Naxçıvanı və Türkiyəni birləşdirəcək Zəngəzur avtoyolu istifadəyə veriləcək”, deyə politoloq əlavə edib.

Zaur Məmmədov bildirib ki, dəmir yolunun istifadəsi bir qədər vaxt aparacaq: “Bunun üçün dəmir yolunun keçəcəyi bütün ərazilərdə relslərin yenilənməsinə, bəzi yerlərdə isə tikintisinə ehtiyac var. Tezliklə işğaldan azad edilmiş ərazilərimizdə Horadiz-Zəngilan-Ağbənd dəmir yolunun inşasına başlanılacaq. Ermənistan ərazisindəki dəmiryolu xəttinin bərpası ilə Rusiya məşqul olacaq”.

Zaur Məmmədovun sözlərinə görə, Lavrovun bu həftə İrəvana, gələn həftə isə Bakıya baş tutacaq səfərləri də əldə edilmiş razılıqların möhkəmləndirilməsi məqsədi daşıyır: “Eyni zamanda qeyd etmək lazımdır kı, təhlükəsizliyi Rusiyanın zəmanətində olacaq Zəngəzur nəqliyyat yolunun işə salınmaması üçün Vaşinqtondakı müəyyən qüvvələr hərəkətə keçiblər. ABŞ erməni diasporası, Dövlət Departamentindəki məşhur ermənipərəst siyasətçilər Ermənistanın Azərbaycan və Türkiyə ilə münasibətlərinin mülayimləşməsinə qarşıdırlar. Digər tərəfdən, ABŞ -dakı dərin dövlət də bu layihənin reallaşmasına müsbət yanaşmır. Avrasiyanın mərkəzindən keçəcək bu xəttin Rusiyanın “kurasiyası” altında olmasından Vaşinqton məmnun deyil və belə vacib yola özləri nəzarət etmək istəyirlər. Baydenin son soyrıqım bəyanatı da buna hesablanmışdı”.



Paylaş: