İsrail televiziyası iyunun 17-də məhkəmə zalında vəfat etdikdən sonra növbəti gün sadəcə ailə üzvlərinin iştirakı ilə səhərin erkən saatlarında dəfn edilən Misirin sabiq Prezidenti Məhəmməd Mursinin torpağa basdırıldığı məzarın görüntülərini yayan ilk KİV orqanı olub.
 Misir hakim dairələri İsrailin İctimai Yayım İdarəsinin Yaxın şərq üzrə müxbiri Royi Kayisə 67 yaşlı mərhum Prezidentin dəfn olunduğu qəbiristanlıqdan reportaj hazırlamağa icazə verib.

Mursi Qahirənin cənub-qərbindəki Nasr bölgəsində “Müsəlman Qardaşlar Təşkilatı”nın mürşidlərinin dəfn edildiyi məzarlıqda basdırılıb. 

Kayis ibri dilində hazırladığı reportajda qəbiristanlıqda güclü təhlükəsizlik tədbirlərinin görüldüyünü, oraya heç kimin buraxılmadığını, eləcə də baş vermiş hadisə fonunda ölkədə vəziyyətin stabil olduğunu bildirib.

O, həmçinin qeyd edib ki, Mursinin vəfatı Misir KİV-də adi xəbər kimi təqdim edilib, hətta bəzi mətbuat orqanları buna dair məlumat belə dərc etməyiblər. 

Xatırladaq ki, M. Mursi 2012-2013-cü illərdə prezident olub. O, kütləvi etiraz aksiyalarından sonra 2013-cü ildə vəzifəsindən kənarlaşdırılıb. Növbəti gün həbs edilib.


Paylaş: