Rusiya Federasiyasının silahlı qüvvələri Lvov aviasiya zavodunda Ukrayna döyüş təyyarələrinin olduğu dayanacağı və Nikolaev və Voznesensk ətraflarında yerləşən sursat anbarlarını yüksək dəqiqlikli silahlarla məhv edib. 

Bu barədə jurnalistlərə Rusiya Müdafiə Nazirliyinin rəsmi nümayəndəsi, general-mayor İqor Konaşenkov məlumat verib. "Martın 18-də səhər saatlarında yüksək dəqiqlikli uzaqmənzilli silahlar Ukraynanın hərbi infrastrukturuna zərbələr endirib. Zərbə nəticəsində Lvov şəhərindəki təyyarə təmiri zavodunda Ukrayna döyüş təyyarələrinin olduğu dayanacaq, həmçinin Nikolaev və Voznesensk ətraflarında sursat anbarları və Ukrayna hərbi texnikası məhv edilib”, - deyə Konaşenkov bildirib.