Şimali Makedoniya daha 6 rusiyalı diplomatı “arzuolunmaz şəxs” elan edib.

regionxeberlericom.az “TASS”a istinadən xəbər verir ki, bu barədə məlumatı ölkənin Xarici İşlər Nazirliyi yayıb.

Rusiyanın Şimali Makedoniyadakı səfiri Sergey Bazdnikin XİN-ə çağırılıb və ona diplomatik nota təqdim edilib. Notaya əsasən, Rusiyanın Skopye şəhərindəki səirliyinin 6 əməkdaşı “arzuolunmaz şəxs” elan olunub.

Bildirilir ki, həmin əməkdaşlar diplomatik münasibətlər barəsində Vyana Konvensiyasına zidd fəaliyyətlər həyata keçirib və növbəti 5 gün ərzində ölkəni tərk etməlidirlər.

Rusiya XİN-in rəsmi sözçüsü Mariya Zaxarova öz növbəsində bildirib ki, Rusiya sözügedən məsələ ilə bağlı cavab tədbirləri görəcək.

Xatırladaq ki, martın 28-i Şimali Makedoniya Rusiya səfirliyinin 5 əməkdaşını ölkədən çıxarmaq barədə qərar qəbul etmişdi. Bu zaman da həmin əməkdaşlara ölkəni tərk etmək üçün 5 gün verilmişdi.