“Tokayevin bu fərmanı daha çox siyasi xarakter daşıyır”. Bunu Bizim.Media-ya açıqlamasında maliyyə-bank eksperti Əkrəm Həsənov Qazaxıstan Prezidenti Kasım-Jomart Tokayevin MDB-nin Dövlətlərarası Valyuta Komitəsi haqqında sazişinə xitam verməsi barədə imzaladığı fərmana münasibət bildirərkən deyib:

“Belə bir saziş MDB çərçivəsində ödəniş və hesablaşmalar sahəsində qanunvericiliyin uyğunlaşdırılması və eyniləşdirilməsinə hesablanmış addım olub. Həmin saziş daha çox MDB çərçivəsində Rusiya rublu ilə ödənişlərin təmin edilməsinə xidmət edən sazişdir.

Reallığa gələndə həmin sazişin onsuz da elə bir ciddi əhəmiyyəti olmayıb. Çünki MDB çərçivəsində vahid valyuta yoxdur. Düzdür, vaxtilə MDB-nin vahid valyutasının olması barədə razılığa gəlmişdilər. Amma bu məsələ reallaşmadı.

Hazırda Qazaxıstanla Rusiya arasında münasibətlərin getdikcə korlandığını nəzərə alaraq, Mərkəzi Asiya ölkəsinin atdığı bu addım daha çox siyasi addım kimi xarakterizə edilməlidir.

Bununla Qazaxıstan ola bislin üzünü Qərbə doğru çevirdiyini göstərmək istəyir. Həmin addımın hər hansı bir böyük iqtisadi əhəmiyyəti yoxdur. Azərbaycan da həmin sazişə qoşulub. Lakin onun ölkəmizə nə istisi, nə də soyuğu var”.