Ukrayna prezidenti Volodimir Zelenski Rusiyadakı səfərbərliklə bağlı ruslara müraciət edib.

O, bu barədə yaydığı videomüraciətdə danışıb.

“Təsadüfi deyildi ki, Rusiyanın elan etdiyi kriminal səfərbərlik Rusiya vətəndaşları tərəfindən dərhal “qəbiristanlıq” adlandırıldı... Rusiya hakimiyyəti yaxşı bilir ki, onlar öz vətəndaşlarını ölümə göndərirlər – başqa variant yoxdur”, - Zelenski ruslara rus dilində müraciət edərək vurğulayıb.

O əlavə edib ki, rus komandirləri rusların həyatı ilə maraqlanmırlar:

“Sadəcə olaraq ölülərdən, yaralılardan, qaçanlardan və ya əsir düşən rus əsgərlərindən sonra boş yerləri doldurmaq lazımdır. Bu yerləri kim dolduracaq, sizin hökumətin vecinə deyil. Heç xidmət etməyən gənc İT mütəxəssisləri və yalnız Sovet Ordusunda xidmət etmiş pensiyaçılarla... Ona görə də indi sizin hamınız üçün ömrünüzün bitib-bitməyəcəyinə qərar verəcəyiniz əsas məqamdır”.

Zelenski hərbi cinayətkar kimi yad ölkədə ölməkdənsə, çağırış vərəqəsini almamağın daha yaxşı olduğunu vurğulayıb:

"Bu cinayət səfərbərliyindən qaçmaq şikəst olub, sonra aqressiv müharibədə iştiraka görə məhkəmə qarşısında cavab verməkdən yaxşıdır. Ukrayna əsirliyinə təslim olmaq bizim silahlarımızın zərbələri altında ölməkdən yaxşıdır. Bizim tamamilə ədalətli zərbələrimiz altında, çünki bu müharibədə Ukrayna özünü müdafiə edir”.

"Ukrayna təslim olan hər bir rus əsgərinə üç şeyi zəmanət verir. Birincisi, sizinlə sivil qaydada, bütün konvensiyalara uyğun davranılacaq. İkincisi, sizin necə təslim olduğunuzu Rusiyada heç kim bilməyəcək. Üçüncüsü, əgər siz Rusiyaya qayıtmaqdan qorxursunuzsa və özünüz mübadilə istəmirsinizsə, biz bunu da təmin etmək üçün bir yol tapacağıq”, - deyə Zelenski əmin edib.

Xatırladaq ki, sentyabrın 21-də Rusiya prezidenti Vladimir Putin ölkədə qismən səfərbərlik elan edib və müvafiq fərman imzalayıb. Müdafiə naziri Sergey Şoyqu bəyan edib ki, “qismən səfərbərlik” çərçivəsində 300 min nəfərin orduya çağırılması planlaşdırılır. Bununla belə, “Novaya qazeta” Avropa Prezident Administrasiyasındakı mənbəyə istinadən xəbər verir ki, əslində prezident fərmanının milyona qədər insana zəng etməyə imkan verən məxfi bəndi var.