“25 sentyabr 2022-ci il tarixdə Kostanay vilayəti sərhəd xidmətinin “Tobil” şöbəsinin sərhəd naryadı tərəfindən işçi buraxılış məntəqələrindən yan keçərək sərhədi keçməyə cəhd edən 3 Rusiya Federasiyası vətəndaşı saxlanılıb”.
Bu barədə Qazaxıstan Milli Təhlükəsizlik Komitəsi məlumat yayıb.
“Sərhəd pozucuları hərəkətlərini Rusiyada davam edən qismən səfərbərlikdən qaçmağa çalışmaları ilə izah ediblər. Saxlanılanların növbəti dindirilməsi davam etdirilir, daha sonra həmin şəxslər Rusiya tərəfinə təhvil veriləcək”, - deyə Qazaxıstan Milli Təhlükəsizlik Komitəsinin rəsmi saytında gedən məlumatda deyilir.
Qeyd olunub ki, Qazaxıstanın sərhəd təhlükəsizliyini etibarlı şəkildə təmin etmək məqsədilə sərhəd mühafizəsi və buraxılış məntəqələrinin bölmələri gücləndirilmiş iş rejimində işləyir.