Gürcüstanın həbsdə olan sabiq Prezidenti Mixail Saakaşvili yenidən aclıq aksiyasına başlayıb. O, məhkəmə iclasında məsafədən iştirak imkanının yaradılmasını tələb edir. Bu barədə Saakaşvilinin vəkil Şalva Xaçapuridze gürcü mediasına açıqlamasında bildirib.

Sabiq Prezidentin səhhətinə görə cəzadan azad edilməsi ilə bağlı dekabrın 14-nə təyin edilmiş iclas dekabrın 22-dək təxirə salınıb. Hakim bu qərarı Gürcüstan Ədliyyə Nazirliyinin Xüsusi Penitensiar Xidmətinin indiki mərhələdə onun məhkəmədə uzaqdan iştirakını təmin etmək imkanında olmadığını bildirdikdən sonra verib.

“Bu gün mən məhkəməmdə iştirak etmək üçün ən elementar hüquqdan məhrum edildim. Bu, Gürcüstanın və bütün beynəlxalq hüquq normalarının pozulmasıdır. Ona görə də, mən etirazın ifrat formasına - aclıq aksiyasına əl atmağa məcburam”, - Saakaşvili Xaçapuridzenin oxuduğu bəyanatda bildirib.

Saakaşvili qeyd edib ki, səhhətinin hazırkı vəziyyətinin həyati risk daşıdığının fərqindədir: “Ancaq məhkəmə prosesimə heç olmasa bir video bağlantısı üçün güclü zəmanət alana qədər ac qalacağam. İstehza və alçaldılmanın da bir həddi var”.

Qeyd edək ki, bundan əvvəl Saakaşvili iki dəfə aclıq aksiyası keçirib. İlk aksiyası 2021-ci il oktyabrın 1-də saxlanılan gün olub. Sonra 50 gün davam edən aclıq aksiyası sabiq Prezidentin səhhətinə ciddi xələl gətirib. Bundan sonra Saakaşvili xəstəxanaya yerləşdirilib. O, mayın 12-dən “Vivamedi” mülki klinikasında müalicə alır.

Vəkilin sözlərinə görə, dekabrın 22-də Saakaşviliyə uzaqdan məhkəmə iclasında iştirak etmək imkanı verilməsə, o, hakimə etiraz edəcək.

Xatırladaq ki, dekabrın 1-də sabiq Prezidentin hüquqlarını müdafiə edənlər onun cəzasının ləğvi və ya təxirə salınması üçün məhkəməyə müraciət ediblər. Onların fikrincə, ekspertlərin tibbi rəyinə əsasən, Saakaşvilinin cəzasının ləğvi və ya təxirə salınması üçün hüquqi əsaslar var.

Müdafiə tərəfinin arqumentləri

Xalq Müdafiəsi Təşkilatı, eləcə də işgəncə, zorakılıq və stress qurbanları üçün “Empatiya” psixo-reabilitasiya mərkəzi tərəfindən yaradılmış həkimlər qrupu indiki müalicənin nəticə vermədiyini və Saakaşvilinin səhhətinin pisləşdiyini təkid edir. Bununla bağlı ekspertlər sabiq Prezidentin xaricdə ehtiyac duyduğu müalicəni ala bilməsi üçün cəzanın ləğvi və ya təxirə salınmasının vacibliyində israrlıdırlar.

Xalq Müdafiəçisi Təşkilatının həkimlər qrupunun rəyinə görə, Saakaşvili 42 kiloqram arıqlayıb. 2021-ci ilin oktyabrında Saakaşvilinin çəkisi 115 kiloqram olub. Həkimlər hesab edirlər ki, belə sürətlə çəki itirməklə kritik bədən kütləsi indeksinə 2-3 ay ərzində çatacaq və bundan sonra onun orqan sistemlərində geri dönməz zədələnmələr başlayacaq.

Dekabrın 7-də açıqlanan nəticədə Saakaşvilinin həmçinin əzələ kütləsinin azalması və hərəkətin məhdudlaşması, enerjinin tükənməsi, əzalarda hissiyatın pozulması, qızdırma, koqnitiv pozğunluqlar (yaddaşın pozulması, davranış dəyişiklikləri), posttravmatik stress pozğunluğu sindromu aşkarlanıb.

Dekabrın 1-də “Empati” mərkəzi Saakaşvilinin səhhətinin son vəziyyəti ilə bağlı tibbi hesabat dərc edib. 194 səhifəlik sənəd üzərində 10 gürcü və 6 xarici mütəxəssis çalışıb. Mərkəzin rəhbəri Mariam Cişkarianinin sözlərinə görə, sabiq Prezidentdə nevropsik, qastroenteroloji və dayaq-hərəkət sistemi ilə bağlı simptomlar və diaqnozlar mövcuddur. Bundan başqa, Saakaşvilinin görmə problemləri, iştahsızlıq, əzələ atrofiyası, oynaqlarda və sümüklərdə ağrılar var.

Cişkarianinin sözlərinə görə, Saakaşvilinin bütün bədənində cızıqlar mövcuddur ki, bu da infeksion proseslərin və ya intoksikasiyanın olduğunu göstərə bilər.

Üstəlik, saçların toksikoloji müayinəsi zamanı Saakaşvilinin bədənində onun səhhətinin pisləşməsinə səbəb ola biləcək ağır metallar aşkar edilib. Cişkarianinin bildirdiyinə görə, Saakaşvilinin özü onun mümkün zəhərlənməsi ilə bağlı iddiaları spekulyasiya adlandırıb.

Gürcüstan qanunvericiliyinə görə, xəstəliyə görə cəza çəkməkdən azad edilməsi barədə qərar məhkəmə tərəfindən ölüm riskinin yüksək olması və ya xəstənin həyati parametrlərinin saxlanmasının çətinliyi barədə tibbi kollegiyanın rəyi əsasında qəbul edilir.

Bu, simulyasiyadır?

Gürcüstanın ədliyyə naziri Rati Breqadze dekabrın 13-də bildirib ki, Saakaşvili vəziyyətini pisləşdirmək və azadlığa çıxmaq üçün saxtakarlıq edir və özünə zərər yetirir. Onun sözlərinə görə, Saakaşvili saxtakarlığa son qoymasa, nazirlik sabiq Prezidentin həkimlərin və məhkəmənin işinə necə müdaxilə etdiyini göstərən videolar yaymağa məcbur olacaq.

Nazir vurğulayıb ki, videogörüntülər hakimiyyətin əleyhdarlarının israr etdiyinin yalan olduğuna, heç kimin Saakaşviliyə işgəncə vermədiyinin sübutudur.

“Onlar ictimaiyyəti çaşdırmaq, məhkəmə prosesinə müdaxilə etmək üçün hər cür çirkin oyuna əl atırlar”, - nazir vurğulayıb.

Qayıdış və həbs

Xatırladaq ki, Saakaşvili 2021-ci il sentyabrın 29-da Ukraynadan gizli şəkildə Gürcüstana qayıdıb və oktyabrın 1-də paytaxtda saxlanılıb. Tiflis Şəhər Məhkəməsi ona qarşı üç maddə ilə açılan cinayət işə baxır - dövlət vəsaitinin mənimsənilməsi, 2007-ci il noyabrın 7-də etiraz aksiyasının dağıdılması və sərhədi qanunsuz keçmə maddələri ilə.

Üstəlik, sabiq Prezident deputat Valeri Gelaşvilinin döyülməsi və bank əməkdaşı Sandro Girqvlianinin qətlində təqsirli bilinənləri əfv etməsi səbəbindən əvvəl 6 il müddətinə azadlıqdan məhrum edilib. //AYNA//