Tayvan lideri Tsai İnq-venin Mərkəzi Amerika və ABŞ-a səfərlərindən sonra Çin ordusu Tayvan adası ətrafında quru, hava və dəniz qüvvələrinin iştirakı ilə birgə hərbi təlimə başlayıb.

Təlim zamanı Tayvan ətrafında 71 Çin döyüş təyyarəsi və 9 döyüş gəmisi müşahidə olunub.

Çinin dövlət televiziyası CCTV-nin xəbərinə görə, Çin Xalq Azadlıq Ordusunun Şərq Cəbhəsi Komandanlığı “Birgə Qılınc” adlı hərbi təlimlərin məqsədinin adanı dəniz, hava və informasiya mühasirəsinə almaq olduğunu açıqlayıb.

Komandanlığın sözçüsü, polkovnik Xi Yi bildirib ki, təlimlər bazar ertəsinə qədər davam edəcək:

“Bu, Tayvanın müstəqilliyini müdafiə edən separatçı qüvvələrə və onların xarici güclərlə ortaq təxribatlarına qarşı ciddi xəbərdarlıqdır”.

Tayvan Müdafiə Nazirliyi dünən gecə yarısından bu gün axşama qədər adanın ətrafında Çinə aid 71 təyyarə və 9 döyüş gəmisinin göründüyünü açıqlayıb.