İranın şimalındakı Əlborz əyalətində surroqat spirtli içkidən kütləvi zəhərlənmə olub. Hadisə nəticəsində azı 12 nəfər ölüb, 150-dən çox insan zərər çəkib.

Bu barədə regionun Tibb Elmləri Universitetinin prezidenti Şəhram Sayadi xəbər verib.

“Bazar ertəsi, iyunun 19-na olan məlumata görə, zəhərlənənlərin sayı 155-ə çatıb. Təəssüf ki, indiyədək 12 nəfər ölüb”, - deyə Sayadi bildirib.

Qeyd edək ki, ötən həftə Kərəcdə (Əlborz vilayətinin inzibati mərkəzi) bir neçə sakin ağır zəhərlənmə əlamətləri ilə tibb müəssisələrinə aparılıb. Həkimlər xəstələrin saxta spirtli içkidən zəhərləndiklərini müəyyən ediblər. İranın hüquq-mühafizə orqanları surroqat spirtin bazara necə daxil olduğunu araşdırırlar.

Mənbə: TASS