ABŞ-ın Qida və Dərman İdarəsi nəhayət, Alzheimer xəstəliyi olan yetkin xəstələrin müalicəsi üçün Lecanemabın (ticarət adı Leqembi) istifadəsinə icazə verib. 

Regionxeberlericom.az-ın xarici mediaya istinadla məlumatına görə, bu barədə idarənin iyulun 6-da yaydığı press-relizdə deyilir.

Qeyd olunur ki, preparatın təsiri beyində əmələ gələn amiloid lövhələrini azaltmaqdır ki, bu da xəstəliyin müəyyənedici patofizyoloji əlamətidir.

FDA-ya görə, Alzheimer dərmanı klinik effektivliyini göstərib. Əlavə bir araşdırma, xəstəliyin erkən mərhələsində insanlarda "dərmanın təhlükəsizliyini və effektivliyini təsdiqləyib".

Yanvarın əvvəlində Amerika tənzimləyicisi Yaponiya şirkəti “Eisai” və Amerikanın “Biogen” şirkəti tərəfindən hazırlanmış “Leqembi”nin istifadəsi üçün sürətləndirilmiş ilkin razılıq verib. Bu dərman xəstəliyi tamamilə müalicə edə bilmir, lakin o, yalnız onun əlamətləri ilə mübarizə aparmır, həm də inkişafını ləngidir.

Bildiyiniz kimi, Alzheimer xəstəliyi tədricən yaddaşı məhv edir və əqli qabiliyyətlərin deqradasiyasına gətirib çıxarır. Onun dəqiq səbəbləri məlum deyil, lakin insan beynində neyronların ölümünə və sinir əlaqələrinin məhvinə səbəb olan dəyişikliklərlə əlaqələndirilir.

ABŞ-da 6,5 milyondan çox insan bu xəstəlikdən əziyyət çəkir.

Xatırladaq ki, sınaq məlumatları “Lecanemab”ın erkən mərhələdə xəstələrdə Alzheimer xəstəliyinin gedişatını 27 faiz yavaşlatdığını göstərib.