Moskvada Nikulinski Rayon Məhkəməsi Oleq Eydelşteyni Rusiya Liberal Demokrat Partiyasının keçmiş lideri Vladimir Jirinovskinin oğlu kimi tanımayıb. 

Xarici media bildirir ki, bu barədə məlumat məhkəmənin materialında dərc olunub.

"Qəbul etməkdən imtina etdi", - məhkəmənin məlumatında deyilir.

Özünü 2022-ci ilin aprelində vəfat edən siyasətçi Jirinovskinin qeyri-qanuni oğlu hesab edən Oleq Eydelşteyn məhkəməyə müraciət edərək atalıq faktının müəyyən edilməsini istəyib.

“Baza” Telegram kanalının yazdığı kimi, Eydelşteyn Jirinovskinin mirasına sahib çıxmaq istəyib.

LDPR-də Eydelşteynin iddiasını şərh etməkdən imtina ediblər.

Fevral ayında Moskvanın Tverskoy Məhkəməsi Eydelşteyni "hakimiyyət nümayəndəsinin qanuni tələbinə tabe olmamaqla bağlı xırda xuliqanlıq etdiyinə görə" 15 sutkalıq inzibati həbsə göndərib.