Çinin müdafiə naziri Li Şanfu tutduğu vəzifədən uzaqlaşdırılıb və hazırda onunla bağlı araşdırma aparılır.

Bu barədə “Financial Times” kəşfiyyat məlumatlarına istinadən yazır.

“Birləşmiş Ştatlar hesab edir ki, Çinin müdafiə naziri təhqiqat altındadır”, - məqalədə aydınlıq gətirilib.

Nəşrin müəllifləri vurğulayırlar ki, Çin Xalq Respublikasının sədri Si Tszinpin “diqqətini Çin silahlı qüvvələrindəki korrupsiyaya qarşı mübarizəyə yönəldib”. Onlar deyirlər ki, Çin hakimiyyəti xarici işlər nazirinin “şok devrilməsindən” sonra diplomatiyanın “nizamlı” olmasında israr edir. Nəşrin siyasi analitikləri Pekinin hərbi və xarici siyasət idarəsinin elit üzvləri arasında yaranmış vəziyyəti “daha bir iğtişaş əlaməti” hesab ediblər.

Bir gün əvvəl məlum olmuşdu ki, Çin müdafiə naziri ictimaiyyət qarşısına çıxmağı dayandırıb. Nazir qəfil Vyetnamın hərbi idarələrinin rəhbərləri ilə görüşməkdən imtina edib. Hanoy nümayəndələri ilə görüşdən bir neçə gün əvvəl rəsmi Pekin Li Şanfunun səhhətinin pis olduğunu bildirib.