Sabiq futbolçu Rivaldo və “Əl-Hilal”ın futbolçusu Neymarın bacısı Rafaella Bekran Braziliyada dövlət çevrilişinə qarışıb.

Xarici media bildirir ki, Braziliyada prezident Lula da Silvanın qələbəsindən sonra iğtişaşlar və dövlət çevrilişi cəhdlərində sabiq braziliyalı futbolçu Rivaldo ilə Neymarın bacısı Rafaella Bekran iştirak edir.

Prokurorluq onları dövlət çevrilişinə cəhdləri maliyyələşdirməkdə ittiham edib. İğtişaşlar Lula da Silvanın Jair Bolsonaro üzərində qələbəsinə qarşı yönəlib. Rivaldo və Rafaella Bekran yanvarın 8-də, Lula da Silva seçkilərdən sonra Braziliyanın prezidenti olduqda baş verənlərlə bağlı iş açan Federal Polisin araşdırmalarının mərkəzindədir.

Braziliyanın keçmiş prezidenti Bolsonaronun ardıcılları kütləvi şəkildə səfərbər olub. Bu səfərbərliklər ölkədə qarşıdurmalara, iğtişaşlara və həbslərə gətirib çıxarıb. Məhbuslar ifadə verərkən çevriliş cəhdlərini maliyyələşdirənlər arasında “Barselona”nın keçmiş hücumçusu və Neymarın bacısının da olduğunu etiraf ediblər.

Rivaldo bu işə 10.000 avro ianə verməkdə təqsirləndirilir. Lakin vəkili bunu təkzib edərək, onun yalnız “məbəddə ehtiyacı olan insanlara” 380 avro yardım etdiyini qeyd edir. Rafaella Bekrana gəlincə, vəkilləri onun nümayişlərə pul göndərmədiyini bildirib.