İran fevralın 4-dən bir sıra ölkələrlə viza rejimini birtərəfli qaydada ləğv edir.

İRNA agentliyi xəbər verir ki, bu barədə İran xarici işlər nazirinin müavini Əlirza Biqdeli bildirib.

Qeyd olunub ki, Belarus, Serbiya, Bosniya və Herseqovina, Qətər, BƏƏ, Səudiyyə Ərəbistanı, Bəhreyn, Qırğızıstan, Özbəkistan, Tunis, Tanzaniya, Sinqapur, Meksika, Braziliya və Yaponiya da daxil olmaqla 28 ölkə ilə viza rejimi birtərəfli qaydada ləğv edilir.

“Xarici İşlər Nazirliyi 28 ölkə üçün vizaların ləğvi ilə bağlı Nazirlər Kabinetinin təsdiq etdiyi fərman barədə müvafiq orqanlara məlumat verib. Bu fərmana əsaslanaraq, 28 ölkənin İrana səfər edən vətəndaşları üçün 2024-cü il fevralın 4-dən etibarən viza tələb olunmur”, - nazir müavini əlavə edib.

Bununla yanaşı, Biqdeli vurğulayıb ki, Hindistan vətəndaşları yalnız hava yolu ilə sərhədi keçdikdə vizaya ehtiyac duymayacaqlar.