Güləş üzrə Avropa çempionatında yunan-Roma güləşçilərin mübarizəsi başa çatıb.

İdman.biz xəbər verir ki, Azərbaycan yığması 3 qızıl, 2 gümüş və 1 bürünc medal qazanıb.

Millimiz bu nəticə ilə medal əyarında birinci yeri tutub. Yunan-Roma güləşçilərimiz ilk dəfə Avropa çempionatında 3 qızıl qazanıb və komandanın tarixində rekord nəticə sayılır.

Növbəti pillədə qərarlaşan qardaş ölkə Türkiyə güləşçiləri 7 medal qazansalar da, bunlardan ikisinin əyarı qızıl olub.

Güləşçilərin tutduğu yerlərə verilən xalların hesablamasına görə, yığmamız 142 xalla ikinci yeri tutub. Birinci olan Türkiyə komandası 147 xal toplayıb.

Qeyd edək ki, Azərbaycanın yığmasının heyətində Nihat Məmmədli (60 kq), Murad Məmmədov (63 kq), Həsrət Cəfərov (67 kq) qızıl, Rəşad Məmmədov (55 kq) və Ülvü Qənizadə (72 kq) gümüş, Beka Kandelaki (130 kq) isə bürünc medala sahib olub.

İdman.biz