Cəlilabad rayonu, Zərbiəlli kənd sakini Məmmədov Hüseyn Qulam oğlu tərəfindən Hurriyyet.az saytının redaksiyasına şikayət məktubu daxil olub. Saytımız vasitəsilə müvafiq qurumlara müraciət edən şikayətçinin məktubunu olduğu kimi dərc edirik:

“Mən, Məmmədov Hüseyn Qulam oğlu, yazaraq sizdən xahiş edirəm ki, səsimi aidiyyəti qurumlara və ictimaiyyətə çatdırasınız.

Bildirirəm ki, mənə dövlət tərəfindən əvəzsiz verilən 10 hektar 85 sot əkin sahəsini Gülməmmədli kənd sakini Səfərov Hüseyn Qürbət oğlu mənimsəməyə çalışır. O, Əmlak Komitəsinin Cəlilabad rayon şöbəsinin sədri Mircəlal müəllimin köməyilə otuz ilə yaxın əkdiyimiz torpaq sahəsini ələ keçirmək istəyir. Polis kapitanı Elvin müəllim də mənə təzyiq göstərir, deyir ki, bu yer Səfərov Hüseynindir.

Mən etirazımı bildirərək akta qol çəkmədim, dedim ki, əlimdə çıxarışım var. Elvin müəllim mənə bildirdi ki, sənin sənədlərin ləğv olunub. Sual verdim ki, bəs mənim arpam nə olacaq?!.. Onlar yenə bildirdilər ki, sən bu yeri zəbt etmisən, bu torpaq Gülməmmədli kənd sakini Səfərov Hüseynin xüsusi mülkiyyətidir.

Qeyd edim ki, Səfərov qardaşlarının respublikada əli o qədər uzundur ki, həmin torpaq sahəsi ilə bağlı saxta mütəxəssis rəyi alıblar. Rəydə qeyd olunur ki, guya, Hüseynov Azaddan aldığı 3 hektar 15 sot torpaq sahəsini mən zəbt etmişəm. Sağ olsun, müstəntiq Elməddin müəllim işi düzgün araşdırıb və bu rəyi əsassız sayaraq, ləğv etmişdir.

Dəfələrlə mənim yerimi ölçdürüb, guya “artıq əkmişəm” kimi qeyd ediblər.

06 aprel, 2024-cu ildə mən, Məmmədov Əkbər, qardaşım Məmmədov Azər və anam Məmmədova Sidiqə ərazidə olarkən gördük ki, Gülmməmədli kənd sakini Səfərov Hüseyn, torpaq mütəxəssisi Fuad adlı şəxs və kənd bələdiyyəsinin sədri Alovla birlikdə yeri ölçürlər. Atama zəng edib bildirdim ki, yenə yeri ölçürlər. Daha sonra Hüseynə yaxınlaşıb soruşdum ki, əmi, sən bizdən nə istəyirsən? O, mənə dedi ki, torpağın qalan hissəsini verin, ya da elə edəcəm, sizi kənddən çıxaracaqlar.

Qardaşım ona dedi ki, bizim dolanışığımız bu torpaqdan çıxır, öz torpağımızı kimsəyə vermərik. Həmin yerdə anamı, məni və qardaşımı döydülər. Üçümüz də xəsarət aldıq. Sən demə, o, bizdən qabaq gedib diş həkimindən rəy alıb ki, guya döyülüb. Həkimin adı Raufdur. Görün nə qədər özbaşınalıq var. Rauf həkim rəydə yazıb ki, guya, biz onun biləyini sındırmışıq. Bu işi isə 200 manat müqabilində ediblər. Nəticədə isə bizi bu səbəblə polisə verdi. Oğlum Məmmədov Azəri 48 saat müddətinə həbs etdirdi. Lakin ədalətli hakim məhkəmə zalından oğlumu Azad etdi.

8 may 2024-cu il tarixində Apellyasiya Məhkəməsində şikayətə baxıldı. Məhkəmə naməlum səbəblərdən oğlum Məmmədov Azəri həbs etdi və o, hazırda həbsdədir.

Hüseyn Səfərov kənd arasında danışır ki, əgər qalan yeri mənə verməsələr, ailənin o biri üzvlərini də həbs etdirəcəm.

Səfərov Hüseyn sənədləri saxdalaşdırmaqla məşğul olur. Saxta Ukrayna diplomu alıb, Tatlar deyilən ərazidə 5 il kənd sovetinin sədri işləyib.

300 metrlik 2 mərtəbəli ferması, özünün yaşayış evi, təndirxanası və bir neçə yardımçı yaşayış evi var. Həm imkanlıdır, həm də vəzifəli adamlarla tanışlığı var.

Buradan səlahiyyətli şəxslərə işimin araşdırılıb, aydınlaşmağında mənə köməklik göztərəsiniz”.

Redaksiyadan: Yazıda adları qeyd olunan şəxslərin mövqeyini dərc etməyə hazırıq.