RegionXəbərləricom.az-ın elektron poçtuna Şəki rayon Çələbixan qəsəbəsi, ev 42 ünvanında yaşayan Məmmədov Qaçay Mürşüd   oğlu tərəfindən daxil olan müraciətdə deyilir. 

"Bakı  şəhər Yasamal  rayon İcra və Probasiya Şöbəsinin icra məmuru Bəhruz, Ədliyyə Nazirliyində İcra və Probasiya  Şöbəsinin  rəisi  Cəfərov İlqar Xanlar  oğlu, Şamxalova İzzət Arif qızı korrupsiya və rüşvətxorluq əməlləri  ilə  məşğuldurlar. Bakı şəhər Yasamal Rayon Məhkəməsinin Azərbaycan Respublikasının  adından  02.11.2020-ci il tarixdə çıxardığı  qətnamədə   dayım Xəlilov Bəhram  Cəlal  oğlundan  Şamxalova  İzzət  Arif qızı  dələduzluq  yolu  ilə ələ keçirdiyi 19 000 manat  öz təsdiqini tapmışdır. Təəssüflər olsun ki, dəfələrlə şikayət etsəm də, şikayətimə baxılmır. Ona görə də həmin pulu ödətdirməyə köməklik etməyinizi Sizdən xahiş edirəm.

Onu da bildirirəm ki, dayım Xəlilov Bəhram Cəlal oğlu dəfələrlə Ədliyyə Nazirliyində İcra və Probasiya Şöbəsinin rəisi Cəfərov İlqar Xanlar  oğlu ilə əlaqə saxlasa da, dayıma yalan vədlər veriblər. Lakin icraçı  Bəhruz və Şamxalova İzzət Arif qızı əlbir olaraq dayımı aldadıblar. Yalan vədlər verərək,  10 günə, 15 günə 19 000 manatı ödətdirəcəyik deyərək bu günə qədər ödətdirməyiblər. Dayım Ədliyyə Nazirliyində  İcra  və Probasiya  Şöbəsinin rəisi Cəfərov İlqar Xanlar oğlu ilə əlaqə  saxlasa da, 2020-ci ildən bu günə qədər pulu cavabdehə ödətdirməyiblər. Dörd ildir məhkəmə qətnaməsi olmasına baxmayaraq İlqar Cəfərov nədənsə bunu icra etdirmir.  Bununla da o, Azərbaycan Respublikasının adından çıxan qətnaməyə ləkə gətirir.

Mən  özüm  yanvar ayından aprel ayına qədər 5-6 dəfə  Yasamal Rayon İcra və Probasiya Şöbəsinə getmişəm, lakin heç bir  nəticəsi olmamışdır. İcraçı Bəhruz mənə yalan vədlər vermişdir ki, aprel ayının sonuna  kimi həmin  18 000 manat pulu bütöv ödətdirəcəm. Lakin necə ki,  4 ildə mənim dayımın başına oyun açıb, yalan vədlər veriblər, eləcə   bu altı ayda da  başımıza həmin oyunları açırlar. 

Bu  şəxsləri  Siz  vəzifəyə  təyin etmisiniz. Lakin  bu şəxslərin  heç biri Sizdən örnək götürmür. Onu da qeyd edim ki,  İzzət xanımın oğlu Tamerlan   Gömrük Komitəsində işləyir. O da dəfələrlə  vəzifəsindən sui-istifadə edərək dayıma yalan vədlər vermiş, sonda dayıma   deyib ki, “kimə istəyirsən şikayət et”.  Onların dilində “Burda  mənəm, Bağdadda kor  xəlifə” şüarıdir.  Bu şəxslərin heç biri nə Azərbaycan Respublikasının mentalitetinə, nə qanunvericiliyimizə, nə Azərbaycan Respublikasının qanunlarına tabe olmurlar. Bu şəxslərin gözünü rüşvət o qədər örtüb ki, hansı xalqın məmuru olduqları belə yadlarından çıxarıblar. Siz dəfələrlə kütləvi informasiya vasitələrində xalqın  qarşısında çıxış edərək bildirmisiniz ki, hər bir məmurun borcudur ki, vətəndaşı qəbul etsin, onun qayğıları ilə məşğul olsun, problemlərinin həllində yaxından köməklik  göstərsin. Ancaq  Bakı  şəhər  Yasamal rayon İcra və Probasiya Şöbəsinin əməkdaşları  və Ədliyyə Nazirliyində İcra və Probasiya Şöbəsinin  rəisi İlqar Cəfərov  nəinki vətəndaşın problemlərini  həll etmək, hətta bizim kimi şəxsləri qəbul etməkdən belə imtina  edirlər.

Qeyd edim ki, mən bu məsələ ilə bağlı  beş-altı  dəfə Yasamal rayon İcra və Probasiya Şöbəsində, iki  dəfə  də Ədliyyə Nazirliyində olmuşam, beş  dəfə Beyləqan şəhərində Şamxalova  İzzət Arif qızı ilə görüşmüşəm. Lakin  həmin vaxtdan bu günə qədər  heç bir köməklik  olunmamışdır. Dələduz İzzət Arif qızı yalan vədlər versə də, hələ də  pulu geri qaytarmamışdır. Bütün bunlara  baxmayaraq həmin vaxtdan bu günə qədər dayım Xəlilov Bəhram Cəlal oğlu  hələ də borc-xərc tapıb işinin arxasıyca  məni göndərir.  

Bəlkə də mənim məktublarım Sizin ünvana çatmır və ya çatdırılmır. Həqiqətən Yasamal rayon İcra və Probasiya Şöbəsinin işçiləri və Ədliyyə Nazirliyində  İcra və Probasiya  Şöbəsinin  rəisi  İlqar bəyin etdiyi  özbaşınalıqlar heç bir qanunvericiliyə və dövlətçiliyə sığışdırılası dərəcədə deyil. 

Bu səbəbdən ölkə başçısı olaraq Sizə müraciət  edərək dayım Xəlilov Bəhram  Cəlal  oğlunun  19 000 manat pulunun Şamxalova İzzət Arif qızından alınıb özünə qaytarılmasını  və Yasamal rayon  İcra və Probasiya Şöbəsinin icraçısının, vəzifəli  şəxslərinin, xüsusilə Ədliyyə  Nazirliyində  İcra  və Probasiya Şöbəsinin rəisi Cəfərov İlqar Xanlar oğlu barəsində ciddi tədbir görülməsini, hazırkı işin nəzarətə götürülməsini xahiş edirəm."

Yazıda adları çəkilən şəxslərin də mövqeyini dərc etməyə hazırıq...