Bərdə rayonu, 588 saylı qəsəbə, bina 14, mənzil 35-də yaşayan Səfərov İlham Bala oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, Ağdam rayonu, 12 saylı məktəbin direktoru Nərmin Quliyeva onun gözdən əlil övladını qərəzli şəkildə sinifdən sinifə keçirmir:

“Mən, Səfərov İlham Bala oğlu, 1978-ci ildə Əsgərən rayonunun Şuşakənd kəndində anadan olmuşam. 1988-ci ildə Dağlıq Qarabağdan qaçqın düşmüş, Ağdam rayonunun Göytəpə kəndində məskunlaşmışıq.

1993-cı ildə də Ağdam rayonundan təkrarən qaçqın düşdük və Bərdə rayonunda Qaçqınlar üçün salınmış 588 saylı qəsəbədə, bina 14, mənzil 35-də müvəqqəti məskulaşmışıq.

Qeyd edim ki, oğlum 2009-ci il təvəllüdlü Səfərzadə Şirin İlham oğlu Ağdam rayonu, 12 saylı məktəbin 8-ci sinif şagirdidir. 12 nömrəli məktəb qəsəbəmizin həyətində yerləşir. Ehtiyatsızlıq nəticəsində övladımın gözünə dəmir asqol girib. Akademik Zərifə Əliyeva adına xəstəxanada həkimlərin səyinə baxmayaraq, uşağın sağ gözü amputasiya edildi. Daha sonra protez gözlə təmin edildi.

Ağdam rayonu, 12 saylı məktəbin direkoru Nərmin Quliyeva məktəbə təqdim olunan xəstəlik sənədlərini gizlədib. Xəstəlik sənədlərini ortaya çıxarmamaqla yanaşı, məndən rüşvət istədi. Pul verə bilmədikdə isə, uşağı sinifdə saxladı. Direktor qərəzli şəkildə mənə deyir ki, “get, hara istəyirsən şikayət et, pulumu verib haqlı çıxacağam”.

Özüm müharibə əliliyəm, yoldaşım da müharibə veteranıdır.

Bacardığım qədər Elm və Təhsil Nazirliyinə və Ağdam təhsil sektoruna şikayət etmişəm. Şikayətimə baxan yoxdur. Direktor Nərmin Quliyeva yalandan bütün orqanları aldadır ki, uşağın gözünün çıxması ilə bağlı cinayət işi başladılıb. Bu direktor şikəst uşağın həyatını məhv edir. Onun pulu, imkanı var deyə rəsmi qurumlar da göz yumur.

Mən səlahiyyətli qurumlardan xahiş edirəm ki, uşağımın gələcəyi üçün mənə kömək edin. Bu uşağın 50 faiz həyatı hardasa məhv olub. İmkan verməyin rüşvətxor direktor və müəllimlər bunu 100 faiz etsin”.

Məsələ ilə bağlı Ağdam rayonu, 12 saylı məktəb direktoru Nərmin Quliyeva ilə əlaqə saxlaya bilmədik.

Redaksiyadan: Aidiyyəti qurumların mövqeyini dərc etməyə çalışacağıq.