Yeni Azərbaycan Partiyasının 97 saylı Tərtər-Ağdərə-Goranboy seçki dairəsindən namizədi Anar Məmmədovun seçicilərlə görüşlərini bələdiyyələr və Tərtər rayon İcra Hakimiyyəti təşkil edir.

Tribunainfo.az xəbər verir ki, bu barədə yazıçı Kəramət Böyükçöl paylaşım edib. O bildirib ki, bu, Seçki Məcəlləsinin 11-1.1 və 55.2.1-ci maddələrinin pozulmasıdır. Belə ki, görüşlərdən fotolar yayan deputatlığa namizəd Anar Məmmədovun yanında Tərtər RİH-nin İctimai-siyasi və humanitar məsələlər şöbəsinin müdir müavini Zabil Paşayev də var.

Xatırladaq ki, namizəd A.Məmmədov bundan öncə də Seçki Məcəlləsinin 75.2-ci maddəsini pozub plakatını lövhələrə təşviqat başlamadan əvvəl asmışdı. Həmçinin o, Bərdə və ətraf rayonlardan olan seçiciləri Tərtər əhalisi kimi ictimaiyyətə təqdim etmişdi.