Qış aylarında soyuq hava və qapalı mühitlərdə daha çox vaxt keçirmək virusların və infeksiyaların yayılma ehtimalını artırır. Xüsusilə qrip və respirator infeksiyalar bu mövsümdə daha çox rast gəlinir. Həm böyüklər, həm də uşaqlar üçün bu dövrdə immunitetin güclü olması xəstəliklərə qarşı mübarizədə əsas rol oynayır. 

Sağlamlığı qorumaq və immuniteti gücləndirmək üçün ətraflı araşdırma etmişik. 

Yetkin yaşda olan şəxslər bu qaydalara əməl etməlidirlər:

Düzgün qidalanma: Vitamin C və D qəbul edin. Portağal, limon, kivi, ispanaq kimi qidalar Vitamin C ilə zəngindir. Günəş işığı azaldığı üçün D vitamini əlavələri qəbul etmək faydalı olar.

Sink tərkibli qidalar yeyin: Balıq, paxlalılar və qoz-fındıq sinklə zəngindir və immuniteti gücləndirir.

Probiotiklərə diqqət edin: Kefir, qatıq və digər fermentləşdirilmiş məhsullar bağırsaq sağlamlığını dəstəkləyir, bu da immunitetə təsir edir.

Digər əsas məsələ yuxu rejimi ilə bağlıdır. Yetkinlərin hər gecə 7-8 saat keyfiyyətli yuxuya ehtiyacı var. Yuxu çatışmazlığı immuniteti zəiflədir və infeksiyalara qarşı bədəni həssas edir.

Fiziki aktivlik də önəmli nüansdır. Soyuq havada olsa belə, mütəmadi gəzinti və ya idman etmək bədənin müqavimətini artırır. Ev şəraitində məşq proqramları qurmaq da effektivdir.

Gigiyenaya əhəmiyyət verməyi yaddan çıxarmaq olmaz:

•    Əlləri tez-tez sabun və ilıq su ilə yuyun.

 •    Ümumi istifadə olunan əşyaları təmiz saxlayın. •    Xüsusilə iş yerlərində, kompüter və telefon kimi əşyaları dezinfeksiya edin.

Stresdən uzaq durmaq lazımdır. Stress immunitet sistemini zəiflədir. Meditasiya, nəfəs məşqləri və hobbilərə vaxt ayırmaq rahatlıq gətirir.

Azyaşlıların səhhətini qorumaq üçün bu məqamlara riayət edilməlidir:

Balanslı qidalanma:

•    Uşaqların qida rasionuna çoxlu təzə meyvə və tərəvəz daxil edin.

•    Evdə təbii hazırlanan meyvə şirələri ilə qida dəyərini artırın.

Peyvəndlərin vaxtında tətbiq edilməsi ən vacib qaydadır.Həkim məsləhəti ilə qrip peyvəndi və digər mövsümi peyvəndlərin vaxtında vurulması vacibdir.

Uşaqların fiziki cəhətdən aktiv olmasına diqqət etmək önəmlidir.Soyuq hava onları evdə saxlasa da, uşaqların hərəkətdə olması vacibdir. Evdə kiçik idman oyunları və ya fəaliyyətlər təşkil etmək faydalıdır.

Həmçinin, uşaqların əllərini düzgün yumaq vərdişini inkişaf etdirmək, oyuncaqları təmiz saxlamaq vacibdir. Əlavə olaraq, soyuq hava ilə təmasdan qorumaq üçün uşaqları lay-lay geyindirin. Onların ayaqlarının isti qalması soyuqdəymənin qarşısını alır.

Ümumi tövsiyələr isə bundan ibarətdir:

•    Evləri tez-tez havalandırmaq virusların yayılmasını azaldır.

•    Efir yağları ilə (məsələn, lavanda və ya çay ağacı yağı) havanı təmizləmək də effektivdir.

Təbii müalicə vasitələrini də diqqətdə saxlamaq faydalıdır:

•    Bal və zəncəfilli çay boğaz ağrısını yüngülləşdirir və bədəni isitməkdə kömək edir.

•    İtburnu çayı, Vitamin C mənbəyi olaraq immuniteti gücləndirir.

Bolca maye qəbul edin. İstər böyüklər, istərsə də uşaqlar gün ərzində kifayət qədər su içməlidir. Qış aylarında isti çay və şorba kimi mayelərə üstünlük vermək olar.

Qeyd edək ki, soyuqdəymə və ya qrip əlamətləri güclüdürsə, özbaşına müalicədən qaçaraq mütləq həkimə müraciət vacibdir. Qış aylarında sağlamlığın qorunması üçün bu tövsiyələri gündəlik həyatınıza daxil edin. Güclü immunitet və düzgün yaşam tərzi həm xəstəliklərdən qorunmağa, həm də ümumi həyat keyfiyyətini artırmağa kömək edəcək. Unutmayın ki, sağlamlıq ən böyük sərvətdir!