Yenidən Müsavat Partiyasının başqanı seçilən Arif Hacılı Modern.az-a açıqlamasında opponentləri Yadigar Sadıqlı və Tofiq Yaqubluya partiyada vəzifə təklif edə biləcəyini qeyd edib.

Partiya başqanı "Keçən qurultaydan sonra Yadigar Sadıqlını və Tofiq Yaqublunu Müsavat Partiyasının başqan müavini təyin etmişdim. İndi də belə bir təkliflə əlaqədar müzakirələr aparacağıq. Onların özləri üçün uyğun hesab etdikləri mövqeləri təklif edə bilərik" – deyə bildirib.

A.Hacılının bu fikirlərinə münasibət bildirən Tofiq Yaqublu Modern.az-a açıqlamasında təklif olarsa, etiraz etməyəcəyini söyləyib:

“Mən Müsavatda bütün imkanlardan istifadə edərək, mübarizə aparmaq niyyətindəyəm. Hələlik Məclisə seçkilər elan olunmayıb. Əgər Məclisə seçilməsəm deməli, Divan üzvü ola bilməyəcəm. Başqan müavinliyi isə Məclisin təsdiqləməsinə rəğmən təyin olunan vəzifədir. Məni başqan müavini ikən Arif bəy özü xaric edib. Həmin dönəmdə mənə qoyulan şərtlər də davam edir. Bütün bunlara rəğmən Arif bəy məni başqan müavini təyin edəcəksə, etirazım yoxdur. Ümumilikdə Müsavatın güclənməsi, rejimə qarşı mübarizənin aparılmasında maraqlıyam”.

Seçkilərin qiymətləndirilməsinə gəlincə, T. Yaqublu qalib gəlməsə də, prosesin birmənalı şəkildə demokratik aparıldığını hesab edir:

“Hər kəsin gözü qarşısında səsvermə keçirildi. Amma kimin haqlı olması məsələsi tamam başqa mövzudur. Mənim dediklərim, tələb etdiklərim ortadadır. Çox tətəssüf ki, müsavatçılar partiyanın korporativ maraqlarını üstün tuturlar. Əsasən də mənim Milli Şurada təmsil olunmağımı qəbul edə bilmirlər. Hətta bir çox hallarda Müsavata xəyanət kimi dəyərləndirirlər. Mən bilirdim ki, belə bir halda səs qazanmağım çətin məsələdir. 51 nəfərin mənə səs verməsi belə böyük möcüzədir”.

Başqanlığa digər namizəd Yadigar Sadıqlı isə davasının Müsavatda vəzifə tutmaq olmadığını qətiyyətlə vurğulayıb:

“Mən başqan müavini ola-ola bundan istefa vermiş adamam. Ona görə Müsavatın maraqları, gələcəyi, inkişafı ilə bağlı olaraq, ortaya təkliflər qoydum. Təəssüf ki, qurultay nümayəndələrinin çoxu bunu qəbul etmədi. Arif Hacılının getdiyi yolu isə mən qəbul etmirəm. Ona görə, Arif Hacılının hər hansı vəzifə təklifinə ehtiyacım yoxdur və qəbul etməyəcəm.

Səsvermənin özü ilə bağlı problem yoxdur, göz qabağında, şəffaf aparıldı. Sadəcə səsvermənin aparılması ilə bağlı eyni fikirləri demək olmaz. Çox az vaxt verildi ki, nümayəndələr kampaniya aparsın. Bu ədalətsizliyə İsa Qəmbər öz töhfəsini verdi. Beləliklə seçkilərin ədalətli olmasına ümid qalmadı”.


Paylaş: